प्युठानमा नेपाल बैंक लुट्ने असफल प्रयास

२०७३ भदौ १७ गते शुक्रबार, प्रकाशित

लुटेराको एक समुहले शुक्रबार नेपाल बैंक लिमिटेडको प्युठान शाखा कार्यालय लुट्ने प्रयास असफल भएको छ । साँझ कार्यालय समयपछी बैंकका चौकीदारलाई स्पे्र मार्फत बेहोस बनाई बैंक लुट्ने प्रयास असफल भएको हो ।

कार्यालय समय सकिएपछि लुटेरा बैंकमा आफ्नो मोबाइल छुटेको बहाना बनाउँदै बैंकमा छिरेको बताइएको छ । अहिले लुटेराको खोजी जारी राखिएको जिल्ला प्रहरी कार्यालय प्युठानले जनाएको छ । बैंकका सुरक्षा गार्डले जानकारी गराए लगत्तै बाक्लो मात्रामा सुरक्षाकर्मी परिचालन गरिएको छ ।

जानकारी पाए लगत्तै घटनास्थलमा सहायक प्रमुख जिल्ला अधिकारी भूपबहादुर पुनसहित प्युठान प्रहरी प्रमुखको टोलि पुगेर निरिक्षण गरेको छ । लुटेराले चौकीदारलाई बेहोस बनाउन नसकेपछि तत्काल भागेको बताइएको छ । चौकीदारले आफूमाथि एक्कासि आक्रमण भएकाले लुटेराको पहिचान गर्न नसकिएको बताएका छन् ।

लुटेराले साथमा लिएको अन्दाजी आठ थान बैंकको रुपैयाँ राख्ने ठाउँ काट्ने हेक्जाब्लेड, चार थान हातमा लगाइने पञ्जा लगायत बैंक लुट्नका लागि प्रयोग हुने सामग्री सहितको झोला बैंकमै छाडेर भागेका छन् ।

नेपाल बैंक लीमीटेड प्युठान शाखाका प्रमुख तालिमका लागि भन्दै जिल्ला बाहिर रहेको बताईएको छ । त्यस्तै निमित्त कार्यालय प्रमुख पनि कार्यालय समयपछि घर गएको समयमा बैंक लुट्ने प्रयास भएको हो ।

बैंक लुट्नका लागि प्रयोग भएका सामान हेर्दा शृङ्खलाबद्ध तरिकाले बैंक लुट्न खोजिएको जस्तो देखिएको छ । बैंक लुट्ने प्रयासमा कम्तीमा ४ देखि १० जनासम्म संलग्न रहेको हुन सक्ने अनुमान गरिएको छ । रासस