चन्द्रागिरीमा लुटेरा र प्रहरीबीच गोली हानाहान

२०७३ भदौ २३ गते बिहीबार, प्रकाशित

काठमाडौंको चन्द्रागिरीमा एकाबिहानै लुटेरा समूह र प्रहरीबीच गोली हानाहान भएको छ । चन्द्रागिरी नगरपालिका १ चिहानडाँडामा सुमो गाडीमा रहेका लुटेरा समूह र प्रहरीबीच आज बिहान ५ बजेर २२ मिनेटतिर गोली हानाहान भएको हो ।

लुटेरा समूहलाई पछ्याउने क्रममा प्रहरीमाथि २ राउण्ड गोली फायर भएको र प्रहरीले पनि प्रतिरक्षाका लागी २ राउण्ड गोली चलाएको प्रहरी बताएको छ । गोली चलेपनि दुवै तर्फ कसैलाई कुनै क्षति नभएको प्रहरीले जानकारी गराएको छ ।

चिहानडाँडामा बा १ ज ३९४८ नम्बरको सुमो छाडेर लुटेरा समूह भागेको छ । उनीहरु भागेर जंगलतिर पसेका छन् । लुटेराले छाडेर गएको सुमोमा बन्द अवस्थामा रहेको सेफ फेला परेको महानगरिय प्रहरी परिसर काठमाडौंका प्रवक्ता एसपी प्रद्युम्न कार्कीले बताउनु भएको छ ।

प्रवक्ता कार्कीले भन्नुभयो–‘उनीहरुले कुनै बैंक वा सुनचाँदी पसलमा रहेको सेफ लुटेर लगेको हुनसक्छन । यस विषयमा अनुसन्धान भइरहेको छ ।’

बिहानै काठमाडौंबाट सुमो मातातीर्थतर्फ लागेपछि स्थानीय प्रहरी चनाखो हुँदै त्यसको पिछा गरेको थियो । काठमाडौंबाट अहिले घटनास्थलमा थप प्रहरी पुगेको छ । जंगललाई घेरा हालेर अहिले त्यहाँ सर्च अप्रेसन चलाइएको छ ।

प्रहरीले टाटासुमोमा चारजना सवार रहेको बताएको छ । प्रहरीका अनुसार गाडी धनी पत्ता लगाएर उनी मार्फत फरार व्यक्तिहरुको पहिचान खुलाउने प्रयास भइरहेको छ ।