लोकमानको घरमा म्याद नटाँसी फर्कियो सर्वोच्चको टोली

२०७३ असोज १९ गते बुधबार, प्रकाशित

अख्तियार प्रमुख लोकमानसिंह कार्कीको घरमा अदालतमा उपस्थित हुनुपर्ने म्यादको सुचना टाँस्न गएका सर्बोच्च अदालतका कर्मचारी सुचना नटाँसी त्यसै फर्किएका छन् । कार्कीको नियुक्तिको निर्णय पुनरावलोकन गर्ने सर्वोच्चको निर्णयपछि कार्कीले म्याद बुझ्न अस्वीकार गर्दै आउनुभएको छ ।

कार्कीलाई सुचित गर्न बुधबार सर्बोच्चका कर्मचारी कार्कीको नयाँ बानेश्वर स्थित रोहिणी मार्गमा रहेको घरमा म्याद टाँस्न गएका थिए । तामिल्दार शम्भु खड्का नेतृत्वको टोली उत्प्रेषणयुक्त परमादेशको सूचना टाँस गर्न भन्दै कार्की निवासमा गएको थियो ।

गेट बाहिर निस्किएका एक युवकले आफूहरु भाडामा बस्ने तर घरधनी यहाँ नबस्ने भनेपछि सर्वोच्चको टोली घरधनी नबसेको घरमा सूचना टाँस्न नमिल्ने भन्दै फर्किएको हो । तामिल्दार शम्भु खड्काले अब सम्बन्धित व्यक्तिलाई नै पत्र बुझाउने बताउनुभयो ।

अख्तियार प्रमुख कार्की टंगाल स्थित अख्तियार क्वाटरमै कडा सुरक्षा घेरामा बस्दै आउनुभएको छ । अख्तियार प्रमुख कार्कीको नियुक्ति कानुनसम्मत नभएको उल्लेख गर्दै अधिवक्ता ओमप्रकाश अर्यालले सर्वोच्चमा २०७० वैशाख २९ गते रिट दायर गर्नुभएको थियो ।

सर्वोच्चले उक्त रिट २०७१ असोज ८ गते खारेज गरेको थियो । आफैले खारेज गरेको रिटलाई पुनरावलोकन गर्ने सर्वोच्चले फैसला गरेको हो । अधिवक्ता ओमप्रकाशले लोकमान अयोग्य भएको थप प्रमाण भेटिएको भन्दै पुनरावलोकनको निवेदन हाल्नुभएको थियो ।

त्यसपछि सर्वोच्चले दुवै पक्षलाई अदालतमा उपस्थित हुन म्यादको पत्र पठाएको थियो । रिट दायरकर्ता अधिवक्ता ओमप्रकाश अर्यालले पत्र बुझिसक्नुभएको छ भने अख्तियार प्रमुख लोकमान कार्कीले पत्र बुझ्न अस्विकार गर्नुभएको छ ।