सुन व्यवसायी साजन मुखियाको अपहरणपछी हत्या

२०७४ फागुन २९ गते मंगलबार, प्रकाशित

तस्करीको साढे ३३ केजी सुन गायब भएपछि भरिया सनम शाक्यको हत्या गरिएको घटना सेलाउन नपाउँदै झापामा अर्का सुन व्यवसायीको अपहरणपछि हत्या भएको छ । एक सातादेखि बेपत्ता सुन व्यवसायी साजन मुखियाको शव सोमबार इलामको रोङ गाउँपालिका–३, कोल्बुङमा भेटिएको हो ।

उनी सुन व्यवसायी संघ, झापाका सदस्य समेत हुन् । सुन व्यवसायी संघ झापाका अध्यक्ष राजु धमलाका अनुसार उनको शव मेची राजमार्गदेखि ५० फिट तल बोरामा प्याक गरिएको अवस्थामा भेटिएको हो । घटनामा संलग्न भएको आशंकामा प्रहरीले दुई जनालाई नियन्त्रणमा लिएको छ ।

इलाका प्रहरी कार्यालय, बिर्तामोडका डिएसपी कृष्ण कोइरालाले सुन व्यवसायी मुखियाको शव भेटिएको पुष्टि गरेका छन । शवलाई पोष्टमार्टमका लागि भद्रपुर लगिएको छ ।

पक्राउ परेकाहरुले दिएको बयानका आधारमा मुखियाको शव खोज्दै प्रहरी टोली कोल्बुङ पुगेको थियो । प्रहरी अधिकारीले भने, ‘उनको दुवै हात बाँधेको अवस्थामा शव भेटिएको थियो । घाँटीमा पनि डोरी कसेको डाम देखिन्थ्यो ।’ ९ दिनअघि बजार पुगेर आउँछु भन्दै घरबाट निस्किएका मुखिया एकाएक बेपत्ता थिए ।