करोडौँ ठगेर वडाध्यक्ष फरार, भारतीय भएको खुलासा

२०७४ चैत २७ गते मंगलबार, प्रकाशित

कपिलवस्तुको यशोधरा गाउँपालिका–५ का वडाध्यक्ष लईस पठान विरुद्ध विभिन्न किर्ते, ठगी, दोहोरो नागरिकता मुद्धामा उजुरी परेपछि उनी फरार भएका छन् । वडाध्यक्ष फरार भएपछि वडाको सम्पूर्ण कामकाज प्रभावित भएका छन् ।

नागरिकता सिफारिस, वडाको सामाजिक सुरक्षा वितरण, बार्षिक कार्यक्रम तथा पूर्वाधार निर्माण कार्य रोकिएका छन् । उनी फागुन १९ गते देखि वडा कार्यालयमा आएका छैनन् । पारिवारिक श्रोतका अनुसार वडाअध्यक्ष पठान भारतीय सीमावर्ती बजार खुनुवामा बस्दै आएका छन् ।

विभिन्न व्यक्तिसंग अर्कैको जग्गा देखाई वडाअध्यक्ष पठानले १ करोड बढि रकम ठगि गरेको आरोप छ । कसैलाई किर्ते लालपूर्जा दिएर वा कसैलाई ऋणको कागज बनाई उनले ५ जना भन्दा बढि व्यक्ति संग रकम लिएको उनीमाथि आरोप छ ।

पठान १ करोड १३ लाख रुपैयाँ ठगि गरेको, १२ लाख ५० हजारको चेक (अनादर) बाउन्स गरेको तथा भारतीय नागरिक रहेको भन्दै जिल्ला प्रहरी कार्यालय कपिलवस्तु, रुपन्देही र कपिलवस्तु जिल्ला अदालतमा उजुरी तथा मुद्धा परेको छ । उजुरी लगत्तै पठान भारत पसेका छन् ।

फरार वडाध्यक्ष पठान मर्यादापुर सीमा क्षेत्र पारीको खुनुवा बजार क्षेत्रमा बस्दै आएको स्थानीय मंगल गुप्ताले जानकारी दिएका छन । वडा अध्यक्ष पठानले कपिलवस्तु नगरपालिका ५ का इसहार खाँ संग ३२ लाख रुपैयाँ लिएका थिए । जेसिभी मेशिन किन्ने भन्दै उनले कागज गरेर ३२ लाख लिएको पीडित इसहारको भनाई छ ।

‘भाका नाघेपछि रकम माग्न जाँदा दिएन, दिएको चेक समेत बाउन्स भयो’ ऋण लिएको काजग देखाउँदै उनले भने । आफुले उनी विरुद्ध जिल्ला प्रहरी कार्यालयमा २०७४ साल साउन १२ गते उजुरी दिएपनि हाल सम्म कारवाही नभएको बताएका छन ।

यसै गरि रुपन्देही गैडहवा गाउँपालिका ६ सूर्यपुराका चन्द्रभान बढई संग ३५ लाख रुपैयाँ ठगि गरेको उजुरी समेत परेको छ । उजुरीमा पठानले यशोधरा गाउँपालिका ५ कचरीहवामा ३ विगाहा पक्की जग्गा देखाएर नक्कली लालपूर्जा बनाई ३५ लाख लिएर गएको र हाल सम्म बेपत्ता भएको उल्लेख छ ।

विभिन्न उजुरी तथा मुद्धा परेर वडा अध्यक्ष फरार भएपछि अहिले वडाको सम्पूर्ण विकासे काम ठप्प भएको छ । वडा सदस्य अजय कुमार मिश्राले वडा स्तरीय २० भन्दा बढि पूर्वाधार योजना अलपत्र परेको बताएका छन । उनले भने–‘अब ३ महिना मात्र बाँकी छ, १ करोड बढिको योजना अझै सुरु हुन सकेको छैन ।’

बहुमत वडा सदस्यहरुले आफुलाई कार्यवाहकको जिम्मेवारी दिएपछि सीमापारी बसेको वडा अध्यक्षले सचिव मार्फत काम अघि बढाउन नदिएको आरोप मिश्राको छ । वडासचिवले अहिले पनि वडाका अधिकांश सिफारिश तथा कामहरु भारतमा गई वडाअध्यक्षको हस्ताक्षर गराउने अवैध कार्य गरेको अर्का वडा सदस्य मुनेश्वर यादवको भनाई छ ।

वडा अध्यक्ष लईस पठान विरुद्ध जिल्ला प्रशासन कार्यालय तथा गृह मन्त्रालयमा दोहोरो नागरिकता लिएको भन्ने उजुरी समेत परेको छ । उजुरीकर्ता इसहार खाँका अनुसार उनी भारतीय नागरिक भएको र उनले किर्ते गरि नेपाली नागरिकता लिएको हुँदा नागरिकता खारेजको माग गरेका छन् ।

भारतीय आधारकार्ड तथा भोटरआईडीमा लईस पठानको नाम नईम खाँन रहेको र उनको ठेगाना सीमावर्ती गाउँ शोहरतगढ भएको बताइएको छ । भारतीय प्रमाणपत्रहरुमा नाम थर, बाबुको नाम र ठेगाना फरक रहेपनि तस्वीर भने हुबहु मेल खाने निवेदक इसहारको दाबी छ ।

वडा अध्यक्ष विरुद्ध तमाम ठगि, किर्ते, चेक अनादर र दोहोरो नागरिकता सम्बन्धी उजुरी पर्दा समेत प्रहरीले चासो नदिएको पीडितहरुको आरोप छ । यस सम्बन्धमा जिल्ला प्रहरी कार्यालयले भने ठाडो उजुरीहरु दर्ता भएको र छलफलको लागि लईस पठानलाई बोलाउदा नआएको जानकारी दिएको छ । पठान नयाँ शक्ति पार्टीबाट निर्वाचित भएका हुन् ।