सर्वेन्द्र आईजीपी भएपछी रमेश खरेलको राजीनामा

२०७४ चैत २८ गते बुधबार, प्रकाशित

सहब्याची सर्वेन्द्र खनाल नेपाल प्रहरीको आईजीपी पदमा नियुक्त भएपछी दाबेदार मानिएका डिआईजी रमेश खरेलले आज राजीनामा दिने बताएका छन । आईजीपी हुन नपाएपछी असन्तुष्टी जनाउँदै डिआईजी खरेलले राजीनामा दिने भएका हुन ।

आफ्नो राजीनामाबारे पुष्टि गर्दै डिआईजी खरेलले भनेका छन–‘आइजिपीमा नियुक्त साथीलाई म बधाई दिन चाहन्छु । २९ वर्ष नेपाल प्रहरीको सेवा गरेँ । भोलि (बुधबार)देखि बिदा हुँदै छु ।’

आफूले अवसर नपाउनासाथ सार्वजनिक रूपमा असन्तुष्ट व्यक्त गर्ने, अदालत जाने र राजीनामा दिने जस्ता प्रचलनले फौजमा कस्तो असर गर्ला भन्ने जिज्ञासालाई उनले राजनितिक भागबण्डाको उपज भएको बताएका छन ।

खरेलले भनेका छन–‘पद्धति बसाएर निर्णय गर्नुपर्छ । भागबन्डा नहुने भए मात्र प्रहरीभित्र पनि असल संस्कार बस्न सक्छ । म भलिबल खेलाडीका रूपमा प्रहरी जवान भई यो संगठनमा छिरेको हुँ । प्रहरी जवानकै रूपमा प्रवेश गर्दा पनि म एक दिन शीर्षस्थ स्थानबाट नेपाल प्रहरीलाई हाँक्छु भन्ने सपना देखेको थिएँ । त्यही सपना पूरा गर्न मैले जानाजान गल्ती कहिल्यै गरिनँ । तर, त्यो अवसर पाइनँ । हीन भावना बोकेर बसेँ भने पनि संगठनलाई शतप्रतिशत नतिजा दिन सक्दिनँ । त्यसैले बिदा हुने निर्णय गरेको छु ।’

सरकारले कसै न कसैलाई जिम्मेवारी दिनुपथ्र्यो, एकजनालाई दियो । तपाईंप्रति के अन्याय भयो ? भन्ने प्रश्नमा उनले भनेका छन्–‘म संगठनप्रति आभारी छु । आज जे छु त्यो नेपाल प्रहरीको कारण छु । निर्णय गर्ने जिम्मा सरकारको हो । सरकारप्रति गुनासो छैन । उसलाई ठीक लागेको निर्णय गर्यो होला, बाँकी काम मेरो विवेकको हो । म राजीनामा दिन्छु ।’

खरेलले योग्य सबैले आफुलाई दाबेदार ठान्ने बताउँदै अगाडी भने–‘मैले पनि ठानेँ, के बिराएँ । प्रमाण पेस गर्न सक्दिनँ । मूल्यांकन अरुले गर्ने हो ।’ राजिनामा गर्ने निर्णय आफ्नो अन्तिम भएको र यसबारे कुनै पुर्नविचार नगर्ने उनले बताएका छन । उनले भनेका छन–‘यो रमेश खरेलको बोली हो । बुझ्नुस् फाइनल डिसिजन हो ।’

राजिनामापछीको जीवनका बारेमा आफुले नसोचेको बताउँदै उनले जहाँ भएपनि परिवार र राष्ट्रका लागी काम गर्ने बताएका छन । राजनितिमा लाग्ने बिषयमा भने उनले खासै चासो देखाएका छैनन् । उनले भने–‘मेरो स्वभाव राजनीति सुहाउँदो छैन । तर, गर्दैगर्दिनँ भनेर कसम किन खानू ?’