म्याद गएको जुस बजार पठाउन खोज्दा फन्दामा

२०७५ असार ६ गते बुधबार, प्रकाशित

पर्सा प्रहरीले वीरगञ्जबाट म्याद गुज्रिएको करिब ५० कार्टुन जुस बजारमा पठाउने तयारी गरिरहेको बेला बरामद गरेको छ । वीरगञ्ज महानगरपलिका वडा नम्बर ५ रेल्वे रोडमा कौशल कुमार श्रीवास्तवले सञ्चालन गरेको र्फमबाट म्याद सकिएको ५० कार्टुन जति जुस बरामद भएको प्रहरीले जनाएको छ ।

वीरगञ्ज कारागार पछाडि रहेको श्रीवास्तवको नयाँ घरमा म्याद सकिएको जुस ल्याएर नयाँ मिति राखेर बजारमा सप्लाई गर्ने गरेको सूचनाको अधारमा प्रहरीले बुधबार बिहान छापा मारेको थियो ।

पर्साका प्रमुख प्रहरी उपरीक्षक रेवती ढकालले भनेका छन–‘कोरियन क्यान जुस हो, पुरानो एक्सपाईरीडेट मेटाएर दुई वर्ष डेट बढाएर बजारमा पठाउने गरिएको रहेछ, ३ हजारभन्दा बढी क्यान बरामद भएको छ । डेट हाल्न प्रयोग गरिने मेसिन, सरकारी कार्यालयका स्ट्याम्प पनि भेटिएका छन् । थप अनुसन्धान गर्दैछौं ।’

‘मेड ईन कोरिया’ लेखिएको डेलोस ब्रान्डका जुसको म्याद २०१८ मार्चमै सकिएको छ । तर त्यहाँ थिनरको प्रयोग गरेर क्यान बोतलको पछाडि रहेको पुरानो मिति मेटाएर प्रिन्ट मेसिनको सहायताले नयाँ मिति थप गर्ने गरिएको प्रहरी अनुसन्धानबाट खुलेको छ ।

प्रहरीले फर्मको रेखदेख गर्ने पर्साको सखुवा प्रसौनी गाउँपालिका वडा नम्बर १ शीतपुरका ५७ वर्षीय ओम बहादुर कार्की र प्रिन्टिङको काम गर्ने वीरगञ्ज महानगरपालिका वडा नम्बर ११ श्रीपुर बस्ने मुन्ना भनिने लक्ष्मी साह कानुलाई पक्राउ गरेको छ । उनीहरु दुवैले आफू निर्दोष रहेको बताएका छन् ।

पक्राउ परेका लक्ष्मी साहले श्रीवास्तवको आग्रहमा तीन दिनदेखि प्रिन्टको काम गरेको प्रहरीसँग बताएका छन् । नातामा ज्वाइँ पर्ने श्रीवास्तवको घर आफूले तीन दिनदेखि मात्रै कुरेको र व्यवसायको बारेमा आफूलाई कुनै जानकारी नभएको कार्कीले बताएका छन ।

कार्कीले प्रहरीसंग भनेका छन–‘छोरी ज्वाइँ पोखरा गएका छन, तीन दिन भयो मलाई घर कुर्नु भनेका थिए । मलाई यो व्यवसायको बारेमा केही थाहा छैन । मिस्त्रीहरु आउँछन् काम गर्छन् भनेका थिए,’ उनले भने ‘छोरा छैन, छोरी मात्रै हो, छोरी ज्वाइँले नै फसाउँछन् भने जेलमा गएर बसेर खान्छु ।’