प्रेमीसँगको सम्बन्ध थाहा पाएपछी श्रीमानको हत्या

२०७५ साउन ८ गते मंगलबार, प्रकाशित

कैलालीको भजनी नगरपालिका–९ भुरुवाकी एक महिलाले प्रेमीसँग मिलेर श्रीमानको हत्या गरेकी छन् । निर्मला राजीले प्रेमी दिलिप राजीसँग मिलेर पति नन्दु राजीको हत्या गरेको अनुसन्धानका क्रममा खुलेको इलाका प्रहरी कार्यालय भजनीले जनाएको छ ।

प्रहरी निरीक्षक राजेन्द्रबहादुर चन्दले दिएको जानकारी अनुसार घटनामा संलग्न दुवैजनालाई नियन्त्रणमा लिएर प्रहरीले थप अनुसन्धान गरिरहेको छ । मृतक राजी साउन ४ गते रातिदेखि हराएका थिए ।

उनको शव घरबाट करिब १ किलोमिरको दुरिमा रहेको प्रतिक्षा सामुदायिक वनमा बोरामा हालेर खाल्डोमा गाडेको अवस्थामा फेला परेको थियो । राजीको शव पोष्टमार्टमका लागि टीकापुर अस्पतालमा र्पुयाइएको छ ।

प्रहरीका अनुसार नन्दु सुर्खेतबाट केही दिन अघि मात्रै घरमा आएका थिए । श्रीमतीको सम्बन्ध अन्य केटासँग रहेको थाहा पाएपछि साउन ४ गते राति उनले श्रीमतीलाई कुटपिट गरे र अर्काे कोठामा सुत्न गए ।

नन्दु अर्को कोठामा गएपछि श्रीमतीले प्रेमी दिलिपलाई बोलाएर ठेगान लगाउने योजना बनाइन् । सोही योजना अनुसार घाटी थिचेर हत्या गरेको र हातखुट्टा बाँधी बोरामा हालेर घर नजिकैको वनमा गाडेको दुबैजनाले स्वीकार गरेका छन् ।

नन्दु घरमा नभएको बेला दिलिपलाई निर्मलाको घरमा देखेपछि स्थानीयले यही साउन ६ गते नजिकैको प्रहरी चौकीमा पुगी सम्झाइदिन अनुरोध समेत गरेका थिए ।

प्रहरीले दिलिपलाई बोलाएर श्रीमान नभएको बेला निर्मलाको घरमा किन गएको भनेर सोध्दा निर्मलाले बोलाएर गएको जवाफ दिएका थिए । आइन्दा नजाने बताएपछि प्रहरीले दिलिपलाई छोडेको थियो । तर, घरमा आएको नन्दु तीन÷चार दिनदेखि हराएपछि स्थानीयले प्रहरी चौकीमा खबर गरेका थिए ।

प्रहरीले निर्मलालाई समेत बोलाएर सोधपुछ गर्दा हाउभाउ र प्रतिक्रिया चित्त नबुझेको भन्दै दिलिपलाई समेत नियन्त्रणमा लिएर अनुसन्धान गरेपछि घटनाको रहस्य खुलेको प्रहरी निरीक्षक चन्दले बताएका छन ।