‘छक्का पञ्जा’को चलचित्र इतिहासमा नयाँ रेकर्ड

२०७३ असोज २९ गते शनिबार, प्रकाशित

दुई बर्ष अघि स्वर्गीय श्रीकृष्ण श्रेष्ठ अभिनित चलचित्र ‘कोहिनुर’को व्यापारले सबैलाई चकित बनाएका थियो । कोहिनुर आफैमा उत्कृष्ट त थियो नै श्रीकृष्णप्रति अन्तिम श्रद्धाञ्जली दर्शाउँदै दर्शक हलमा पुगेका थिए । चलचित्रले ११ करोड हारहारीको व्यापार गरेको वितरकहरुले बताएका थिए ।

ठिक दुई बर्षपछी चलचित्र छक्कापञ्जाले चलचित्र कोहिनुरको किर्तिमानी व्यापारलाई उछिनेको छ । चलचित्र ‘छक्का पन्जा’ले रिलिजको छैठौँ हप्तासम्म आइपुग्दा ‘कोहिनुर’को व्यापारलाई उछिनेको हो । छक्का पञ्जाले काठमाण्डौमा ७ करोडको व्यापार गरेको छ भने मोफसलमा ५ करोड माथिको व्यापार गरेको वितरकहरुले बताएका छन् ।

दीपाश्री निरौलाको डेब्यू निर्देशन रहेको चलचित्र छक्का पञ्जाले १२ करोड माथिको व्यापार गर्दै नेपाली चलचित्रको इतिहासमा नयाँ रेकर्ड कायम गरेको छ । चलचित्रले अधिकांश हलमा ५१ दिन मनाउने देखिएको छ । तिहारमा रिलिज हुन लागेका २ ठूला हिन्दी चलचित्रको व्यापारल भने यसको मल्टिप्लेक्सको समयसिमा निर्धारण हुनेछ ।

‘६ एकान ६’ र ‘वडा नम्बर ६’ मा झैं यसमा पनि चर्चित हाँस्य कलाकारहरू नै नायकको भूमिकामा छन् । छक्का पञ्जामा दीपकराज गिरी, प्रियंका कार्की, शिवहरि पौडेल, जितु नेपाल, केदार घिमिरे, बुद्धि तामाङ, वर्षा राउत, नम्रता सापकोटा आदि कलाकारले अभिनय गरेका छन् ।

‘छक्का पञ्जा’ चलचित्रको निर्मातामा दीपकराज गिरी, जितु नेपाल, केदार घिमिरे तथा शिवहरि पौडेल नाम छ । यो चलचित्रमा निर्देशक दीपाश्रीले देशको अवस्थाबाट आजित भएर वैदेशिक रोजगारीमा जाने युवाहरूको कथालाई मार्मिक ढंगबाट प्रस्तुत गर्नुभएको छ ।

‘छक्का पञ्जा’का पुर्व पश्चिम रेल, देख न चम्पा सुन न चम्पा गितहरु चर्चित भईसकेका छन् । हास्य कलाकारहरू नै नायक भएपछि हास्यदृश्य त हुने नै भए । चलचित्र ‘छक्का पञ्जा’मा पुरुषोत्तम प्रधानको छायांकन तथा विपिन मल्लको सम्पादन छ ।