जुर्मुराउँदै क्यानडाबासी नेपाली क्रिकेट खेलाडी

२०७५ असोज १९ गते शुक्रबार, प्रकाशित

बिभिन्न सिलसिलामा क्यानडामा बसोबास गर्दै आएका नेपाली क्रिकेट खेलाडीहरु क्रिकेट खेलको माध्यमबाट क्यानडामा उदाउँदै छन । क्रिकेटप्रेमी उर्जासिल युवाहरुले सन् २०१६ मा स्थापना गरेको क्रिकेट क्लब अहिले नेपाली समाजमा मात्र होइन क्यानेडियन खेलप्रेमीहरुका बिच पनि परिचय बनाइरहेको छ ।

स्थापनाको छोटो समयमै क्यानेडियन क्रिकेट लिगमा सहभागी भएको नेपाली क्रिकेट टिमले २ टिमलाई जित्न सफल भएको छ । १४ टिम सहभागी खेलमा नेपाली क्रिकेट टिमले जिटिए लायन्स र राइजि स्टार माथी विजय हात पारेको हो ।

त्यतिमात्र होइन नेपाली क्रिकेट क्लवले क्यानडामा एनसीसीसी कप क्रिकेट प्रतियोगिताको आयोजना गरि नेपाली र क्यानेडियन क्रिकेट खेलाडीहरुलाई खेल प्रस्तुत गर्ने अवसर पनि प्रदान गरेको छ ।

नेपाली क्रिकेट क्लवका कप्तान इमरानले भने–‘क्रिकेट आफैमा महँगो खेल हो । क्यानेडियन लिगमा सहभागी हुनु नै हाम्रा लागी फलामको चिउरा थियो । तर नेपाली समुदायको सहयोगले यसलाई सहज बनाइदियो । नेपाली दाजु र दिदीबहिनिको माया एवं सद्भाव नै हाम्रा लागी प्रेरणा एवं सफलताको श्रोत हो ।’

नेपाली क्रिकेट क्लवले क्यानडाबासी नेपाली समुदायले विश्वास गरेर आफुहरुलाई गरेको मायाँ र सहयोग, सद्भावलाई निरन्तर जोगाइराख्न क्लबले भबिष्यमा गर्ने कार्य एवं संस्था संचालनको प्रकृया, खेलमा गर्ने मिहिनेत र समाजमा गर्ने व्यबहार अँझ सुदृढ बनाउँदै लैजाने क्लवले जनाएको छ ।

नेपलिज क्यानेडियन क्रिकेट क्लव खाली खेल मात्र नभई विभिन्न सामाजिक काम पनि गर्दै आएको छ । माल्टन मिसिसागा क्षेत्रका सांसद दीपक आनन्दले नेपाली समुदायले निर्वाचनको शुरुवाती देखिनै साथ दिएको स्मरण गर्दै खेलाडी र नेपाली समुदायलाई आफ्नो सहयोग र साथ सधैँ रहिरहने बताएका छन ।