सुधारगृहमा हाईभोल्टेजको करेन्ट लगाएर हत्या

२०७५ माघ १० गते बिहीबार, प्रकाशित

लागुऔषध तथा मदिराको दुव्र्यसनिमा फसेका व्यक्तिलाई बिषेश उपचारबाट सामान्य जीवनमा फर्काउने उद्देश्यका साथ खोलिएका भनिएका अधिकाशं सुधार गृहहरु अमानबिय, क्रुर र यातनागृह भएको तथ्य पछिल्ला केहि घटनाले पुष्टि गरेका छन् ।

केही समय अघि काठमाडौ सुकेधारा स्थित ‘ट्रान्सफरमेशन नेपाल’ नामक सुधार गृहमा भएको अमानवीय व्यवहारको घटना मिडियामा सार्बजनिक भएको थियो । क्रुरुर यातनाबाट २२ जनाको उद्धार भएको केहि समयमा ललितपुरको एक सुधार गृहमा एक व्यक्तिको रहस्यमय मृत्यु भएको छ ।

दोलखाका ४३ बर्षीय सिताराम घिमिरेलाई मदिराको लतबाट छुटाउनका लागि परीवारले माघ ३ गते मात्रै ललितपुर महालक्ष्मीस्थान ४ मा रहेको ‘वी केयर’ लागुऔषध पुन;स्थापना तथा सुधार केन्द्रमा राखेका थिए ।

त्यसको ३ दिन पछि एकाविहानै उनका छोरा साजन घिमिरेलाई सुधार केन्द्रबाट बाबु सिकिस्त रहेकाले तुरुन्त स्टार अस्पतालमा आउन खबर गरे । खबर पाएको केहि छिनमै अस्पतालमा पुग्दा बाबुको निधन भैसहेको थियो ।

चिकित्सकले समेत उनलाई अस्पताल ल्याउनु पूर्व नै निधन भैसकेको रिपोर्ट दिए । सिताराम घिमिरे सुधार भएर सामान्य जीवनमा फर्कीने आशामा सुधार गृह पठाएको परीवारमा ३ दिन भित्रै मृत्युको खबरले मर्माहत बनाएको छ ।

मृतकका आफन्त चन्द्र लामाका अनुसार मृतकको शरीरमा हाइ भोल्टको करेन्ट लगाएको घाउ, बायाँ खुट्टा र हात सुन्नीएर निलो भएको तथा शरीरका विभिन्न भागमा चोट देखिएका छन् । पोष्टमार्ट रिपोर्टमा समेत करङ भाँचिएको देखीएको छ ।

सुधार केन्द्रमा एउटै कोठामा रहेका प्रत्यक्ष दर्शीका अनुसार घिमिरेलाई कुटपीट पछि मुखमा कपडा कोचेर बाँधेर सुताइएको थियो । तर विहान हेर्दा हलचल नगरेपछि सुधार केन्द्र सञ्चालकलाई खबर गरेका थिए ।

सुधार केन्द्र सञ्चालक छिरिङ ग्याल्जेन र म्यानेजर सुनिल खड्का प्रहरी थुनामा छन् । घटना भएको सुरुका दिनमा सुधार गृहका तर्फबाट पीडित समक्ष गल्ती भएको स्वीकार गरेपनि अहिले ‘जे गर्न सक्छौ गर’ भन्ने खालका धम्कीहरु आउन थालेका छन् ।

साथै प्रहरीले समेत पटक–पटक जाहेरी परीर्वतन गर्न लगाउँदा घटना ढाकछोप गर्न लागिएको मृतकका आफन्तको आशंका छ । अहिले मृतकका परीवार काज क्रियामा व्यस्त भएका बेला सुधार गृहका तर्फबाट पावरवाला व्यक्तिहरुलाई कुरा गर्न लगाउने, धम्काउने गरेको आफन्तको आरोप छ ।

सिताराम घिमिरेलाई मासिक १५ हजार शुल्क लिएर सुधार केन्द्र राख्न सुरु गरे पनि सुधार गृहले लिएको पैसाको रसिद भने परीवारलाई दिएको छैन । प्रहरीले नै पटक पटक जाहेरी फेर्न लगाउनु र सुधार गृहवालाको तर्फबाट धम्की आउनुले मृतकका आफन्तले न्याय पाउनेमा आशंका व्यक्त गरेका छन् ।