अनसनरत डा.केसीले मागे प्रधानमन्त्रीको राजिनामा

२०७५ माघ ११ गते शुक्रबार, प्रकाशित

स्वास्थ्य क्षेत्रको सुधारका लागी भन्दै बिभिन्न माग राखेर आमरण अनसनमा बसेका डा. गोविन्द केसीले प्रधानमन्त्री केपी शर्मा ओलीको राजीनामा माग गरेका छन् । प्रतिनिधिसभाले चिकित्सा शिक्षा विधेयक बहुमतले पास गरे लगतै पत्रकार सम्मेलन गरेका डा. केसीले प्रधानमन्त्री नैतिकताबाट च्यूत भएको भन्दै राजीनामा माग गरेका हुन् ।

सहयोगी जीवन क्षेत्रीले पढेर सुनाएको डा. के.सी.को विज्ञप्तीमा भनिएको छ–‘आफ्नै निर्णयबाट विचलित भएकाले उहाँले नैतिकताका आधारमा राजीनामा दिनुपर्छ भन्ने हाम्रो विश्लेषण हो ।’ डा.केसी १७ औं दिनदेखि अनसनरत छन् र उनको तर्फबाट सहयोगी क्षेत्रीले नै लिखित वक्तव्य पढेका थिए ।

आफूसँग भएको सहमति विपरित विधेयक पास भएको भन्दै डा. केसीको विज्ञप्तिमा यो जनतामाथि नै धोका भएको उल्लेख गरिएको छ । डा. केसीले अनसन फिर्ता लिएर विधेयक कार्यान्वयन गर्न सरकारले गरेको आग्रहलाई अस्वीकार गरेका छन् र आमरन अनसन कायमै राख्ने बताएका छन् ।

डा. केसीका सहयोगी क्षेत्रीले सबै माग पुरा भएको भन्ने सरकार र सत्तारुढ दल नेकपाको दाबी खण्डन गरेका छन् । उनले भने–‘सम्बन्धन सम्बन्धी बुँदामा जुन बुँदा थपिएको छ, त्यहाँ सरकारको बद्मासी झल्कन्छ । यसले मेडिकल शिक्षा सुधार हुँदैन ।’