नर्सिङ पढ्न अष्ट्रेलिया गएका विद्यार्थी अन्यौलमा

२०७५ फागुन २ गते बिहीबार, प्रकाशित

सुन्दर भविष्यका खोजीमा नेपालबाट उच्च शिक्षा अध्ययनका लागि अस्ट्रेलिया पुगेका हजारौं विद्यार्थी नेपाली एजेन्टको लापरबाही र गलत सल्लाह र सुझावका कारण संकट र अन्यौलमा परेका छन् ।

पछिल्लो चरणमा ह्वात्तै बढेको नेपाली विद्यार्थीहरू डिप्लोमा अफ नर्सिङ पढ्ने नाममा कलेज र एजेन्टको गलत रवैयाका कारण अन्यौल र समस्यामा परेको स्पष्ट भएको छ । यो समाचार हेमन्त काफ्लेले सेतोपाटी अनलाईनमा लेखेका छन् ।

बैदेशिक अध्ययनको नाममा होडबाजी गर्दै अध्ययन गर्ने निकाय र विषयमा स्पष्ट नहुँदा एआइबीटी कलेजमा अध्ययन गर्ने एक हजार नेपाली विद्यार्थी यतिखेर गलत रवैयाको शिकार भएका छन् ।

चौबिस महिने डिप्लोमा अफ नर्सिङ कोर्स पढ्न आएका नेपाली विद्यार्थी डेढ वर्ष पढेपछि कलेजले नर्सिङ सम्बन्धन नपाउने भएपछि ‘खाउँ भने दिनभरको शिकार नखाउँ भने कान्छा बाउको अनुहार’ भनेझै अन्यौलमा परेका हुन् ।

नेपालबाट बाबुआमाले बिसौँ लाख खर्चेर छोरा छोरीलाई उज्वल भबिष्यको खोजी गर्दै नर्सिङ पढ्न पठाउने, तर अष्ट्रेलिया पुगेर विद्यार्थी गलत रबैयाको सिकार भएर पढाई त्याग्नुपर्ने बाध्यतामा परेपछि कतिपय विद्यार्थी डिप्रेशनको सिकारसमेत भएका छन् ।

अस्ट्रेलियाको शैक्षिक पद्धतिमा अस्ट्रेलियन स्कील क्वालीटी अथोरोटी (अस्क्वा) ले शैक्षिक संस्थाको दर्ता, सञ्चालन र कोर्सको छिनोफानो गर्छ । यस संस्थाले दर्ता दिएपछि र कोर्सको अनुमोदन पछि विद्यार्थी भर्ना लिन प्रारम्भ गरिन्छ । तर, अन्य विषयमा यसको अनुवन्धानले काम गरे पनि नर्सिङ कोर्सका लागि भने अस्ट्रेलियन नर्सिङ एन्ड मिड वाइफरी एक्रिएडिएसन काउन्सिल (एन्म्याक) को स्वीकृती आवश्यक रहन्छ ।

त्यसपछि पनि यी नर्सिङ पढाइ गरेका विद्यार्थीलाई हस्पिटलमा इन्टर्नसिपका लागि अस्ट्रेलियन हेल्थ प्राक्टीसनर रेगुलेटर एजेन्सी (अप्रा) को दर्ता नम्बर आवश्यक हुन्छ ।

यी माथिका प्रारम्भीक तयारीहरुको क्रममा कैयन कलेजहरुले परीक्षणकै क्रममा धमाधम विद्यार्थी लिने र पढाइ सुरू गर्ने अनि कमाइ हाल्ने प्रवृत्तिले विद्यार्थी नराम्रोसँग प्रभावित भएका छन् ।

यसमा राम्रो कमिसनको चक्करमा विद्यार्थी तथा अभिभावकलाई नेपालमा कलेज र प्रक्रयाको बारेमा जानकारी नदिइ भइहाल्छ र पाइहाल्छ भन्ने प्रवृत्तिले विद्यार्थीको भबिष्य अन्यौलमा परेको अष्ट्रेलियामा अध्यनरत बिद्यार्थीहरुले बताउने गरेका छन् ।

अस्ट्रेलियन स्कील क्वालिटी अथोरोटीको मान्यता पाएपछि बिभिन्न प्रावधान राखेर सीओइ जारी गर्दै धमाधम विद्यार्थी भर्ना लिने र विषयका बारेमा स्पष्ट ज्ञान नहुँदा नेपाली विद्यार्थी मारमा परेका हुन् ।

यतिखेर ब्रिसबेन र सिड्नीमा रहेको एआइबीटी कलेजमा मात्र करिब एक हजारको संख्यामा रहेका नेपाली विद्यार्थी पढेर कोर्सको अन्तिम समयमा पुग्दा एन्म्याकले कलेजको पढाइलाई मान्यता नदिँदा अलपत्र परेका छन् ।

एन्म्याकले पछिल्लो पटक भाषागत समस्या देखाउँदै अंग्रेजी भाषा परीक्षा आइएलटीएसमा सात अंक आउने विद्यार्थीलाई मात्र डिप्लोमा अफ नर्सिङ पढन पाउने निर्णय गरेपछि थुप्रै विद्यार्थी थप मर्कामा परेका छन् ।

सन् २०१७ को अक्टोबरमा यो नियम जारी गरिए पनि त्यसअघि भर्ना भएका विद्यार्थीको हकमा यो नियम लागू नहुने भनिएको थियो । तर, सबै विद्यार्थीले अंग्रेजी टेष्टमा सात अंक ल्याउनुपर्ने भएपछि धेरै विद्यार्थी मर्कामा पर्नुका साथै नसिंङ कोर्स समेत झन्झटिलो बन्न पुगेको छ ।

काउन्सिल फर इन्टरनेशनल स्टुडेन्ट अस्ट्रेलिया (सीसा) का केन्द्रीय अध्यक्ष विजय सापकोटाले यो विषय गम्भीर रहेको र हजारौं नेपाली विद्यार्थी प्रभावित हुनु दुखद भएको बताएका छन् ।

उनले भनेका छन्–‘नेपाली विद्यार्थीहरू विदेशमा पढ्न आउँदा सम्बन्धित निकाय र पढने विषयमा स्पष्ट नभएका कारण यो समस्या देखिएको हो । नेपालका एजुकेसनल कन्सलटेन्सी र परामर्शदाताले यर्थाथ बिवरण नदिएका कारण पनि कतिपय समस्या आइपरेको हो ।’