हास्य टेलिश्रृंखला तितोसत्यका लाजालामको निधन

२०७३ मंसिर २४ गते शुक्रबार, प्रकाशित

हास्य टेलिश्रृंखला तितोसत्यमा लाजालाम नामले चिनिने कलाकार आरपी भट्टराइको निधन भएको छ । तितोसत्यमा संगै काम गर्ने अर्का कलाकार शिवहरी पौडेलले आफ्नो फेसबुक वालमा भट्टराइको निधन भएको पुष्टि गरेका छन् ।

भट्टराई चार दिन अघि मात्रै काठमाडौंबाट आफ्नो घर विराटनगर गएका थिए । बिहीबार बेलुकी फूपूको घरमा गएका आरपी बिहान मृत अवस्थामा भेटिएका हुन । बेलुकी खाना खाएर सुतेका आरपी बिहान मृत भेटिएको खबर उनको फूपूको परिवारले दिएका थिए ।

अत्याधिक मोटोपनाबाट पिडित उनी केही समयदेखी त्यसलाई घटाउने कसरतमा रहेको आफन्तहरुले बताएका छन् । ४२ बर्षका कलाकार आरपी प्रेसर र सुगर रोगबाट पीडित थिए । उनी आफ्नो मोटो शरीरका कारण चिन्तित थिए ।

पछिल्लो समय उनले अभिनय गरेको चलचित्र ‘छक्का पन्जा’ अहिले हलमा चलिरहेको छ । उनले चलचित्र ‘वडा नम्बर ६’ लगायतका केहि सफल चलचित्रमा काम गरेका छन् । हाँस्य सिरियल ‘तितो सत्य’मा काम गरेपछि उनको चर्चा चुलिएको थियो ।

उनको श्रीमति र २ छोरा छन् । उनले केहि समय अगाडि आफ्नै आवाजमा एल्बम पनि सार्वजनिक गरेका थिए । कलाकार आरपीको आवाजमा समावेश ‘कालो रैछु म पनि’ बोलको गीतको भिडियो केहि हप्ता अगाडि मात्र युटुबमा सार्वजनिक भएको थियो ।