काठमाण्डौ उपत्यकामा १२ बर्षपछी हिउँ पर्यो

२०७५ फागुन १६ गते बिहीबार, प्रकाशित

नेपालीमा एउटा उखान प्रख्यात छ–‘१२ बर्षपछी खोला पनि फर्किन्छ ।’ उखानमा भनेजस्तै १२ बर्षपछी मध्य फागुनमा काठमाडौँ उपत्यकामा हिउँ परेको छ । काठमाडौँ उपत्यका भित्रैको बस्तीमा १२ वर्षपछि हिउँ परेको हो ।

राजधानी उपत्यकाका साँखु, गोदावरी, भक्तपुरको दुवाकोट, चाँगुनारायणका बस्तीसम्म हिउँ खसेको हो । यसअघि काठमाडौँ उपत्यका भित्रै २०६३ फागुन २ गते (फेब्रुअरी १४, २००७) मा हिउँ परेको थियो ।

त्यतिबेला काठमाडौँका त्रिपुरेश्वर, न्यूरोडसहीतका मूख्य भागमै हिउँ परेको थियो । त्यसअघि वि.सं. २००१ साल पुसमा काठमाडौँ उपत्यका भित्रै हिमपात भएको रेकर्ड छ ।

जाडो जान लागेको समयमा बर्षासँगै हिउँ परेपछि काठमाडौँ उपत्यकाको मौसम पनि चिसिएको छ । हिउँले उपत्यकाका चन्द्रागिरि, नागार्जुन, शिवपुरी क्षेत्रका डाँडाकाँडा सेताम्मे भएका छन् । बुधबारदेखि देशैभर बर्षात् र हिमपात भएको थियो ।

पूर्वको ताप्लेजुङदेखि पश्चिमको बाजुरा र डडेल्धुरासम्ममा पनि बाक्लो हिमपात भएको छ । मौसम विभागका अनुसार हिँजोदेखि देशभर मौसम बदली भएर पानी परिरहेको छ । पश्चिमी वायूको प्रभावका कारण देशको मध्य, पश्चिम र पूर्वी भागमा हिमपात र वर्षा भएको मौसमविदले बताएका छन् ।