अछाममा विप्लव माओवादी र प्रहरीबिच भिडन्त

२०७५ चैत १३ गते बुधबार, प्रकाशित

नेत्रविक्रम चन्द विप्लव नेतृत्वको प्रतिबन्धित नेकपाका कार्यकर्ता र प्रहरीबीच अछाममा दोहोरो भिडन्त भएको छ । अछामको रामारोशन गाउँपालिकाको बाटुलसैनमा मंगलबार दिउँसो १२ बजे दुई पक्षबीच गोली हानाहान भएको जिल्ला प्रहरी कार्यालय, अछामले जनाएको छ ।

गस्तीमा रहेको टोलीमाथि विप्लव कार्यकर्ताले फायर खोलेपछि त्यसको जवाफ फर्काएको अछामका प्रहरी प्रमुख जनक शाहीले बताएका छन् । प्रहरीले विप्लव समूहले फायर खोलेको बताए पनि विप्लव समूहका एक नेताले भने प्रहरीको भनाइ झुटो भएको दाबी गरेका छन् ।

विप्लव समुहका एक नेताले भनेका छन्–‘प्रहरीले सुरूमै हामीमाथि फायर खोलेपछि त्यसको जवाफी फायर हामीले गरेका हौं ।’ प्रहरीको गोली लागी विप्लवका अछाम इञ्चार्ज सामान्य घाइते भएको उनले बताएका छन् ।

दोहोरो भिडन्त भएको क्षेत्रमा सुरक्षा व्यवस्था कडा पारिएको छ । विप्लव समूहका नेता–कार्यकर्ताको गतिविधि नियन्त्रणका लागि जिल्लाको सुरक्षा व्यवस्था कडा पारिएको प्रहरीले जनाएको छ ।

यसअघि काभ्रेमा पनि दोहोरो भिडन्त भएको दाबी प्रहरीले गरेको थियो । तर, नेकपाका मध्य कमाण्ड इञ्चार्ज हेमन्तप्रकाश ओली सुदर्शनले भिडन्तको प्रहरी दाबी गलत भएको विज्ञप्तिमार्फत बताएका थिए । त्यसको केही दिनपछि उनी काभ्रेबाट पक्राउ परेका थिए । सोमबार मात्रै विप्लवका कोशी इञ्चार्ज पनि प्रहरीबाट समातिएका छन् ।