अबैध सम्बन्ध लुकाउन प्रेमीकाको हत्या गरेको खुलासा

२०७५ चैत २१ गते बिहीबार, प्रकाशित

पाल्पामा गत महिना सडेगलेको अवस्थामा फेला परेको एक महिलाको शव उनकै प्रेमीले अवैध सम्वन्ध ढाकछोप गर्न हत्या गरेर फालेको खुलासा भएको छ । फागुन २४ गते घरबाट हराएकी रिब्दिकोट गाउँपालिका–५ नयाँटोलकी ५० वर्षीया ओमकुमारी घर्तीलाई उनकै छिमेकी ४६ वर्षीय नुरबहादुर विश्वकर्माले हत्या गरि फालेको प्रहरीले जनाएको छ ।

हार्थोक जान्छु भन्दै उक्त दिन घरबाट हिडेकी घर्तीको शव फागुन ३० गते सोही वडाको ज्योतिष टोलस्थित कुशुमखोला नयाँटोल जाने बाटो नजिकैको खरबारीमा सडेगलेको अवस्थामा फेला परेको थियो ।

घर्ति र विश्वकर्माबिच अवैध सम्बन्ध रहँदै आएको र त्यही सम्बन्ध ढाकछोप गर्न आफुले फलामको रड प्रहार गरि हत्या गरेर फालेको विश्वकर्माले स्वीकार गरेको पाल्पा जिल्ला प्रहरी प्रमुख एसपी विश्वमणि पोखरेलले जानकारी दिएका छन् । मृतकका २७ वर्षीय छोरा पदमबहादुर घर्तीले किटानी जाहेरी दिएका थिए ।