आफ्नै श्रीमानले गुण्डा लाएर गरे अनिताको हत्या

२०७५ चैत २३ गते शनिबार, प्रकाशित

गत फागुण १० गते कपिलवस्तुको वाणगंगामा मध्यरातमा आफ्नै घरमा हत्या गरिएकी अनिता पौडेलको हत्यामा उनकै श्रीमान संलग्न रहेको खुलासा भएको छ । उनको हत्यामा श्रीमानसहित तीन जना संलग्न रहेको पाइएको प्रहरीले जनाएको छ ।

तीनै जनालाई प्रहरीले पत्रकार सम्मेलन गरी सार्वजनिक गरेको छ । नीजि विद्यालयमा सहयोगीका रुपमा कार्यरत अनिताको हत्यापछि कपिलवस्तुका विभिन्न संघ–संस्था र मिडयाले हत्यारा पत्ता लगाउनका लागि व्यापक दवाव दिएका थिए ।

जिल्ला प्रहरी कार्यालय कपिलवस्तुका अनुसार उक्त हत्यामा उनका श्रीमान विष्णु पौडेल (विष्णु), भिनाजु श्रीहरि गौतम र गुनाखर अधिकारी संलग्न रहेको पाइएको छ । १ जना भने फरार छन् । हत्याका मुख्य योजनाकार रहेका अधिकारी अनिताका आफन्त होइनन् । उनी श्रीहरि गौतमले हत्या गर्न पठाएका व्यक्ति हुन् ।

जिल्ला प्रहरी कार्यालय कपिलवस्तुका प्रहरी उपरिक्षक अच्युतम पुडासैनीले हत्यामा संलग्न मुख्य अभियुक्त पक्राउ गरिएको र लामो समयको गहिरो खोज–अनुसन्धानबाट मुख्य अभियुक्त पक्राउ गर्न सफल भएको दाबी गरे ।

फागुन १० गते मध्यरातमा आफ्नै घरको किचनमा हत्या गरिएकी अन्दाजी २९ वर्षीया अनिता र सो काण्डबारे प्रहरीले विभिन्न कोणबाट अनुसन्धान गरेको थियो । सो हत्याको प्रमुख कारण पारिवारिक रिसिइबी देखिएको छ ।

अनिताका श्रीमानले दोस्रो श्रीमती विहे गरि भारतमा बसोबास गर्दै आएका छन् । अनिता यहाँको होराइजन इग्लिस् बोडिङ्ग स्कुलमा कार्यालय सहयोगीको रुपमा काम गर्थिन् । विष्णुले अनितालाई हेलाँ गरेर घरबाट भगाउन खोजेको प्रहरी अनुसन्धानबाट खुलेको छ ।

अनिता घर नछाड्ने मनस्थितिमा रहेकी थिइन् । अनिता घरमै बसेर जीवनयापन गर्न चाहन्थिन् । दुई छोराछोरीकी आमा अनिता घरमै बस्ने निधो गरेपछि विष्णुले उनलाई जसरी पनि घरबाट निकाल्न चाहन्थे । जुन कुरा आफ्ना भिनाजुलाई बताएका थिए ।

अनिता विष्णुकै घरमा बसेपछि विष्णुलाई सम्पत्तिको मोह बढेको देखिन्छ । घरको सम्पत्ति कब्जा गरेर अनिता बसेपछि उनको हत्या योजना बन्छ । अनिताका ८ बर्षका छोरा र १२ बर्षकी छोरी रहेकी छिन् ।

अनिता हत्याकाण्डमा जोडिएका दुई जना व्यक्ति अपराधीक पृष्ठभूमिबाट आएका हुन् । मृत्तक अनिताका श्रीमान्ले विष्णुमार्फत आफ्ना भिनाजु श्रीहरि गौतमलाई अनितालाई साइट लगाउनको लागि आग्रह गर्दछन् ।

श्रीहरि पटक–पटक विभिन्न मुद्धामा जेल गएका व्यक्ति हुन् । उनी सामान्य ठेक्कापट्टा गरेर जीविकोपार्जन गर्दै आएको प्रहरीले जनाएको छ । अपराधिक गतिविधिमा संलग्न हुँदै आएका श्रीहरिले विभिन्न माध्यमबाट बुटवल १० चरंगीका गुनाखर अधिकारीलाई भेट्छन् ।

अधिकारी पनि आपराधिक पृष्ठभूमिका व्यतिm हुन् । अपराधी श्रीहरि गौतमले कस्तो व्यतिmलाई प्रयोग गरेर हत्या गर्न सकिन्छ भन्ने कुरा गहिरोसँग बुझेको देखिन्छ । अनुसन्धनमा रहेका एक प्रहरी अधिकृतले भने, ‘अनिता हत्या प्रकरणमा पनि यस्तो भएको छ । सर्पका खुटा सर्पले देखे जस्तै ।’

अधिकारी यसभन्दा अघि ४ बर्ष जेल सजाय काटेका व्यक्ति हुन् । उनले चोरी र डकैती मुद्दामा बुटवल र रामेछाप कारगारमा सजाय भोगेका थिए । प्रहरीका अनुसार श्रीहरिले गुनाखरलाई अनिता र विष्णु बीचको सम्बन्धबारे सबै कुरा बताउँछन् ।

अनितासँगको विवाद जसरी भएपनि सल्टाए ७ लाख रुपैयाँ दिने लोभ देखाउँछन् । त्यसपछि गुनाखरले अनितासँगको विवाद समाधानका लागि आफ्ना कामहरु अगाडि बढाउँछन् । यो बिषयमा बिष्णुलाई सबै थाहा हुन्छ । अनि विष्णुले रकम दिने सहमति दिन्छन् ।

विवाद मिलाउनकै लागि गुनाखरले गत भदौदेखि अनितासंगको चिनजान तीव्र बनाउने गरेको अनुसन्धानबाट पुष्टि भएको छ । धेरै प्रयास गर्दा पनि अनितासँगको विवाद मिल्न नसकेपछि उनको हत्या योजना बन्छ । त्यसपछि उनको हत्या गर्ने निश्कर्षमा उनीहरु पुगेको प्रहरी अनुसन्धानले देखाएको छ ।

जिल्ला प्रहरी कार्यालय कपिलवस्तुका प्रहरी उपरिक्षक अच्युतम पुडासैनीले अधिकारीलाई २० गते नै पक्राउ गरिएको बताए । पक्राउ परेकाहरुमाथि ज्यान मार्ने उद्योगअन्तर्गत कानुनी प्रक्रिया अघि बढाउने प्रहरीले जनाएको छ ।