महराको दशैं हिरासतमै बित्ने, पुष्टि भए ५ बर्ष कैद

२०७६ असोज २० गते सोमबार, प्रकाशित

संसद सचिवालयमा कार्यरत महिला कर्मचारी रोशनी शाहीलाई बलात्कार गरेको अभियोग लागेका निवर्तमान सभामुख कृष्ण बहादुर महरालाई प्रहरीले उनकै सरकारी निवास बालुवाटारबाट पक्राउ गरेको छ ।

जिल्ला अदालत काठमाडौंबाट पक्राउ अनुमति लिएर प्रहरीले महरालाई आइतबार साँझ उनकै निवासबाट पक्राउ गरेको हो । महराले बलात्कार प्रयास गरिएको भनिएकी संसद सचिवालयकी कर्मचारी रोशनी शाहीको जाहेरीपछी प्रहरीले महरालाई पक्राउ गरेको हो ।

महरालाई प्रहरीले आईतबार पक्राउ गरे पनि उनको मुद्दाको सुनुवाइ भने अब २८ गतेमात्र हुनेछ । दसैं बिदा परेकोले हाल अदालत बन्द छ । जिल्ला अदालत भने कसैलाई अपरझट पक्राउ गर्न अनुमति दिनुपर्ने भएकोले खुला रहेको हो ।

२८ गते अदालत खुलेपछि प्रहरीले महरालाई अदालतमा उपस्थित गराउने छ । त्यसपश्चात प्रहरीले अनुसन्धान गर्नको लागि अदालतसँग म्याद थप्न अनुमति लिन्छ । यो सबै अदालती प्रक्रिया पुरा नहुँदासम्म महरा दशैं अवधीभर प्रहरी खोरमा नै रहनेछन् ।

यो आरोप पुष्टि भएमा उनलाई तीन वर्ष ६ महिना वा ५ वर्ष कैद सजाय समेत हुनेछ । प्रहरीका अनुसार उनीविरुद्ध जबरजस्ती करणी उद्योगमा मुद्दा चलाइनेछ । मुलुकी अपराध संहिताले कुनै पनि कसूरको उद्योग पुष्टि भए तोकिएभन्दा आधा सजाय हुने व्यवस्था गरेको छ ।

संहिताको परिच्छेद १८ मा रहेको जबरजस्ती करणी सम्बन्धी कसूर सम्बन्धी दफाको उपदफा ३ (ङ) मा पीडित १८ वर्ष वा सोभन्दा बढी उमेरको महिला भए सात वर्षदेखि १० वर्षसम्म कैद सजाय हुनसक्ने उल्लेख गरिएको छ ।

महरा प्रकरणमा पीडितको उमेर १८ वर्षभन्दा बढी भएकाले यो व्यवस्था लागू हुनेछ । तर, सात वा १० वर्ष कुनलाई आधार मान्ने भन्ने विषय चाहिँ अपराधको प्रकृति हेरेर न्यायाधीशले तोक्नेछन् । महरालाई ३ बर्ष कैद हुन्छ या ५ बर्ष त्यो भने अदालतको फैसलापछी टुंगो लाग्नेछ ।

बलात्कारको प्रयास गरेको भन्दै रोशनी शाहीले शुक्रबार निवर्तमान सभामुख कृष्णबहादुर महराविरूद्ध प्रहरीमा उजुरी दर्ता गराएकी थिइन् । रोशनीले दर्ता गराएको सोही उजुरीका आधारमा महरालाई पक्राउ गर्ने अनुमति लिन प्रहरी अदालतमा गएको थियो ।

उजुरीमा उनले आफूलाई महराले बलात्कार गर्न प्रयास गरेको र त्यसको प्रतिवाद गर्दा आफूमाथि हिंसा गरेको भन्दै उनले नयाँ बानेश्वर प्रहरी वृत्तमा दिएको उजुरीमा उल्लेख गरेकी छिन् । त्यसो त सुरुमा महराले आफुमाथी बलात्कार प्रयास गरेको भन्दै मिडियामा आएकी रोशनीले बिचमा महराले आफुलाई केही नगरेको भन्दै प्रहरीमा समेत निवेदन दिएकी थिईन । तर अन्तिम समयमा उनले फेरी महराविरुद्ध जाहेरी दिएकी हुन् ।

असोज १२ गते आइतबार महरा रक्सीको बोतल बोकेर शाहीको तीनकुनेस्थित डेरामा पुगेका थिए । त्यो रातको घटनाको भोलिपल्ट शाहीले मिडियालाई महराले आफूलाई बलात्कार र हातपात गरेको बताएकी थिइन् । भोलिपल्ट उनको अनुहार र जिउमा चोटपटक देखिएको थियो ।

उसो त शाहीले महराले बलात्कार प्रयास गर्दै गर्दा प्रहरीको हन्टिङ लाईन १०० मा फोन गरेर आफुमाथी बलात्कार प्रयास गरेको भन्दै गुहार मागेकी थिईन । प्रहरी उच्च स्रोतका अनुसार सो घटना भएको राति प्रहरी उनको डेरामा पुगेपछि पनि उनले महराले आफूलाई बलात्कार गर्ने प्रयास गरेको र शारीरिक हिंसा गरेको बताएकी थिइन् ।

शाहीको मध्य रातको त्यो बयान पनि प्रहरीले रेकर्ड गरेर राखेको थियो । प्रहरी शाहीको डेरामा पुग्दा महरा भने निस्किसकेका थिए । घटना भएको पर्सी पल्ट असोज १४ गते प्रहरीले शाहीको डेरामा गएर महराले ल्याएका रक्सीको बोतल, घम्साघम्सीमा भाँचिएको महराको चस्माको खुट्टा र कोठाबाट हतारमा निस्किँदा छुटेको जुत्ताको तलुवा लगायत सामान बरामद गरेको थियो ।

जाँचका लागि ती सामान प्रहरीको फरेन्सिक ल्याबमा पठाइसकेको छ । त्रिवि शिक्षण अस्पतालमा शुक्रबार नै रोशनीको स्वास्थ्य परीक्षण गरिसकिएको छ । महरालाई पक्राउ गर्नुभन्दा पुर्व प्रहरीले रोशनी शाहीको कोठामा गए नगएको पुष्टि गर्न सिसिटिभि फुटेज, कल डिटेल लगायत हेरेको थियो । महरा रोशनीको कोठामा गएको पुर्ण रुपमा पुष्टि भएपछी महरालाई पक्राउ गर्नुबाहेक प्रहरीसँग अरु कुनै विकल्प थिएन ।