पोखरामा चितुवाले नौ बर्षीया बालिकालाई खायो

२०७६ माघ २४ गते शुक्रबार, प्रकाशित

चितुवाले आक्रमण गर्दा पोखरामा नौ बर्षीया एक बालिकाको मृत्यु भएको छ । जिल्ला प्रहरी कार्यालयका प्रहरी निरीक्षक नरहरि अधिकारीले दिएको जानकारी अनुसार बिहीबार राति पोखरा–३२ कोठेगाउँकी नौ वर्षीया पूजा विकलाई चितुवाले आक्रमण गर्दा बालिकाको मृत्यु भएको हो ।

मृतक बालिकाका बुवाआमा दीपक र अप्सरा विकले छोरी खेलेर घर नफर्किएपछि साँझ खोजी गर्न गएका थिए । जनताको चौतारास्थित प्रहरी चौकी र स्थानीयवासीले खोजी गर्ने क्रममा गाउँबाट केहीपर रहेको जङ्गलमा बालिकाको शव क्षतविक्षत अवस्थामा भेटिएको प्रही निरीक्षक अधिकारीले बताएका छन् ।

प्रहरी र स्थानीयवासीले चितुवाको खोजी जारी राखे पनि फेला पार्न सकेका छैनन् । यसअघि तनहुँका विभिन्न स्थानमा चितुवाको आक्रमणमा परी बालबालिकाले ज्यान गुमाएका घटना सार्वजनिक भएका थिए । पछिल्लो समय मानव वस्तीमा पसेर बाघले बालबालिकामाथी आक्रमण गर्ने क्रम बढ्दो छ ।