लकडाउन बैशाख १५ गतेसम्म थप गर्ने निर्णय

२०७७ वैशाख २ गते मंगलबार, प्रकाशित

यसअघि बैशाख ३ गतेसम्म देशभर घोषणा गरिएको लकडाउन वैशाख १५ गतेसम्म थप गर्ने मन्त्रिपपिरषद् बैठकले निर्णय गरेको छ । मंगलबार दिउँसो प्रधानमन्त्री निवास बालुवाटारमा बसेको मन्त्रिपरिषद् बैठकले लकडाउन १२ दिन थप्ने निर्णय गरेको एक मन्त्रीले जानकारी दिएका छन् ।

यसअघि सरकारले चैत ११ गते एक हप्ताका लागि भनेर लकडाउन गरेको थियो । पछि उक्त अवधि बढाएर चैत २५ हुँदै वैशाख ३ गतेसम्म पुर्याइएको थियो । लकडाउन हुनुभन्दा अघि नेपालमा कोरोना संक्रमितको संख्या जम्मा दुई जना थियो । तीमध्ये पनि एक जना उपचार भएर घर फर्किसकेका थिए ।

अहिले कोरोना संक्रमितको संख्या १६ पुगेको छ । नेपालमा भेटिएका कोरोना संक्रमित प्राय सबै विदेशबाट आएकाहरु मात्रै छन् । संक्रमितहरु कैलालीको लम्कीचुहामा कोरोना पुष्टि भएकी ६५ बर्षिया बृद्धा र धनगढीकी १ महिला बाहेक सबै विदेशबाट आएकाहरु हुन् ।

आज मात्रै वेलायतबाट आएका २ जनामा कोरोना भएको पुष्टि भएको छ । एकै परिवारका उनीहरुमध्ये १ जनाको रिपोर्ट आउन बाँकी छ । उनीहरु आमा छोरा र बुहारी चैत ५ गते वेलायतबाट आएका थिए ।