तेरिया मगर भईन ‘झलक दिखला जा’की बिजेता

२०७३ माघ ७ गते शुक्रबार, प्रकाशित

नेपालकी तेरिया मगरले भारतको चर्चित टेलिभिजन ‘झलक दिखला जा’को बिजेता बनेकी छिन् । ‘बलिउड लाइफ’ नामक अनलाईनका अनुसार उनले अन्य २ प्रतिस्पर्धीलाई उछिन्दै प्रतिस्पर्धा जितेकी हुन् । यसको आधिकारीक घोषणा हुन भने बाँकी नै छ ।

तेरियाले यसअघि जी टीभीबाट प्रशारण भएको ‘डान्स इन्डिया डान्स’को उपाधी पनि जितेकी थिइन् । ‘झलक दिखला जा’मा तेरियाको चर्को प्रतिस्पर्धा सलमान यूसूफ खानसँग देखिएको थियो । तर, भोटिङको आधारमा तेरियाले उपाधी जितेको अनलाइनले जनाएको छ ।

यो शो शनिबार बेलुकी कलर्स च्यानलबाट प्रशारण हुनेछ । रुपन्देहीकी तेरियालाई भोट गर्न भन्दै केहि दिन अगाडि मात्र पत्रकार सम्मेलन मार्फत आह्वान गरिएको थियो । अनलाइन र एसएमएसबाट उनलाई भोट गरिएको थियो ।

तेरियाले कति भोट पाइन् भन्ने खुलेको छैन । तर, सेलिब्रेटीहरुको डान्स शो पनि जितेर तेरियाले अर्को सफलता कायम गरेकी छिन् । उनलाई नेपाल, ईन्डिया लगायतका देशहरुमा बस्ने नेपालीहरुले भोट गरी जिताएका हुन ।