बिहिबार थप ३ जनामा कोरोना संक्रमण पुष्टि

२०७७ जेठ १ गते बिहीबार, प्रकाशित

बिहीबार नवलपरासीमा थप एक जनामा कोरोना संक्रमण देखिएको छ । यो समाचार तयार पार्दासम्म बिहिबार ३ जना संक्रमित थपिएका छन् । संक्रमित व्यक्ति नवलपरासीको देवचुली नगरपालिका–१२ का ४९ वर्षीय पुरूष रहेको स्वास्थ्य मन्त्रालयले जनाएको छ ।

भरतपुरको प्रयोगशालामा गरिएको परीक्षणमा उनमा संक्रमण पुष्टि भएको हो । बिहीबार बिहानै पनि कपिलवस्तुकी ६ वर्षीया बालिकासहित काठमाडौंको चन्द्रागिरिका ३२ वर्षीय पुरूषमा पनि संक्रमण देखिएको थियो ।

योसँगै नेपालमा कोरोना संक्रमितको संख्या २ सय ४६ पुगेको छ । तीमध्ये ३५ जना निको भएर घर फर्किसकेका छन् भने त्यसमा पनि तीन जनालाई पुन; संक्रमण देखिएपछि अस्पतालमा भर्ना गरिएको छ ।