युवतीको बिषयमा छुरी हानि हत्या गर्ने शेर्पा पक्राउ

२०७७ साउन ३१ गते शनिबार, प्रकाशित

काठमाडौंको टोखा नगरपालिका–९ मनमैजुस्थित मितेरी पुलमा एक युवकको हत्यामा संलग्न भएको आरोपमा प्रहरीले आङदोर्जे शेर्पालाई पक्राउ गरेको छ । शुक्रबार राति बसन्त टोलमा रहेको गोर्खाली खाजा घरमा शेर्पा र लक्ष्मण तामाङको समूहबीच झगडा भएको थियो ।

झगडाका क्रममा काठमाडौं–१६ बसन्तनगरका आङदोर्जे शेर्पाले नुवाकोट घर भई तारकेश्वरमा बस्ने लक्ष्मणलाई छुरा प्रहार गरेका थिए । उनको ग्रिनसिटी अस्पतालमा उपचारका क्रममा मृत्यु भएको प्रहरीले जनाएको छ ।

घटनापछि भागेका शेर्पालाई भने माछापोखरीस्थित नागार्जुन गेष्ट हाउसमा लुकेर बसेको अवस्थामा पक्राउ गरिएको महानगरीय प्रहरी परिसर, काठमाडौंले जनाएको छ । प्रहरीका अनुसार युवतीको विषयलाई लिएर युवाहरुबिच झगडा भएको थियो ।