जापानमा थप १८ प्रिफेक्चरमा अर्ध–आपतकाल

२०७८ माघ ११ गते मंगलबार, प्रकाशित

जापान सरकारले कोरोना भाइरसको पछिल्लो भेरियन्ट ओमिक्रोनको संक्रमण बढदै गएपछी थप १८ ओटा प्रिफेक्चरलाई अर्ध–आपतकालीन उपायहरु लगाइएको क्षेत्रको सूचिमा थप्ने भएको छ । सोमबार प्रधानमन्त्री फुमिओ किशिदाले थप १८ ओटा प्रिफेक्चरमा अर्ध–आपतकाल लगाउने बताएका हुन् ।

अर्धआपतकाल थप गर्ने सरकारको निर्णयलाई सल्लाहकार समितिले मञ्जुरी दिएको छ । सल्लाहकार समितिको मञ्जुरीसंगै सरकारले आज मंगलबार अबेर गरी अर्धआपतकाल लागु गरेको घोषणा गर्ने बताइएको छ । हालसम्मको जानकारी अनुसार २७ तारिख बिहिबारको दिनबाट थप १८ ओटा प्रिफेक्चरमा अर्धआपतकाल लागु हुनेछ ।

थप १८ ओटा प्रिफेक्चरमा अर्धआपतकाल लगाएसंगै अर्धआपतकाल लगाइएका प्रिफेक्चरको संख्या ३४ पुग्नेछ । जापानमा जम्मा ४७ ओटा प्रिफेक्चर रहेका छन् । अर्ध–आपतकाल थप गरिएका १८ प्रिफेक्चरहरुमा शिजुओका, इशिकावा, ओसाका, क्योटो, ह्योगो, ओकायामा, शिमाने, फुकुओका, ओइता, होक्काइदो, आओमोरी, यामागाता, फुकुशिमा, तोचिगी, इबाराकी, नागानो, सागा र कागोशिमा हुन् ।

सरकारले अर्ध–आपतकालको सुचीमा थप गरेका प्रिफेक्चरहरुमा बिहिबार देखि फेब्रुअरी २० सम्ममा अर्धआपतकाल लगाउने घोषणा गरेको छ । योसँगै ७० प्रतिशत भन्दा धेरै जापानी भु–भाग पूर्व आपतकालीन अवस्थाामा रहनेछन् । सरकारले आज मंगलबार कोरोना भाइरस नियन्त्रणको जिम्मा पाएका मुख्यालयहरुको एक बैठकमा यसबारे औपचारिक निर्णय गर्दैछ ।

यो उपाय लागू भएपछि सम्बन्धित प्रिफेक्चरका गभर्नरहरुले रेष्टुराँ तथा बारहरुलाई सञ्चालन अवधि कम गर्न अनुरोध गर्ने जस्ता प्रतिबन्धहरु लागू गर्न सक्नेछन् । सरकारले हाल अर्ध–आपतकाल लगाइएका प्रिफेक्चरमा पनि अर्ध–आपतकाल जनवरी ३१ पछि लम्ब्याएर फेबु्रअरी २० सम्म कायम गर्ने प्रधानमन्त्री किशिदाले बताएका छन् ।