२०२६ सम्म टोयोटाका विद्धुतीय गाडीका १० मोडेल

२०७९ चैत २६ गते आइतबार, प्रकाशित

जापानी अटो निर्माता कम्पनी टोयोटा मोटरले सन् २०२६ देखि वर्षेनी १५ लाख थान विद्युतीय सवारी साधन बेच्ने लक्ष्य लिएको छ । गएको वर्ष कम्पनीले संसारभर जम्मा २४ हजार थान विद्युतीय सवारी साधन बेचेको थियो । उक्त विक्रीलाई हेर्दा कम्पनीको २०२६ को विक्री लक्ष्य निकै महत्वाकांक्षी देखिन्छ ।

यो लक्ष्य पूरा गर्न उसले सन् २०२६ सम्ममा विद्युतीय सवारी साधनका १० ओटा मोडल सार्वजनिक गर्ने योजना बनाएको छ । यो सन् २०२१ को डिसेम्बरमा कम्पनीले घोषणा गरेको विश्वभर वार्षिक रुपमा विद्युतीय सवारी साधनको विक्री बढाउने योजनाको हिस्सा हो । कम्पनीले नयाँ पुस्ताको विद्युतीय सवारी साधन उत्पादनमा जोड दिइरहेको छ ।

आफ्ना ग्राहकहरुलाई कार्बनरहित अनेक विकल्पहरु उपलब्ध गराउने पनि कम्पनी प्रतिबद्ध भएको टोयोटाले भनेको छ । टोयोटाले सन् २०३० देखि भने विश्व बजारमा वार्षिक ३५ लाख थान ईभी बेच्ने लक्ष्य लिएको छ । यो लक्ष्य हासिलमा मद्दत पुगोस् भनेर कम्पनीले सो अवधिसम्म ३० ओटा ब्याट्रीबाट चल्ने ईभी मोडल निकाल्ने योजना बनाएको छ ।