जापानमा बिश्वमै पहिलो 3D-प्रिन्ट रेल स्टेशन
जापानले फेरि एकपटक परम्परा र नवीनताको संयोजनमा विश्वलाई चकित तुल्याएको छ। जापानको कान्साई क्षेत्रमा पर्ने वाकायामा प्रिफेक्चरको रमणीय अरिदा शहरमा रहेको हात्सुशिमा स्टेशनमा विश्वकै पहिलो 3D प्रिन्ट गरिएको रेल स्टेशन भवन निर्माण गरिएको छ। वेस्ट जापान रेलवे कम्पनी (JR वेस्ट) ले उक्त नयाँ भवन जुलाई महिनाबाट प्रयोगमा ल्याउने अपेक्षा गरिएको जनाएको छ।
परम्परा र प्रविधिको मेल
सानो तर क्रान्तिकारी यो स्टेशन JR वेस्टको ग्रामीण पूर्वाधारलाई आधुनिक बनाउन र स्थानीय आकर्षण जोगाउन गरिएको पछिल्लो प्रयास हो। रमाइलो कुरा त के छ भने—यो स्टेशनमा जान जापान रेल पास प्रयोग गर्न सकिन्छ!
जापान र विश्वका लागि प्रविधिको पहिलो कदम
१० वर्ग मिटर मात्र क्षेत्रफल भएको यो एकतले स्टेशन 3D प्रिन्टिङ प्रविधिको प्रयोग गरेर बनाइएको छ— जुन विश्वकै पहिलोपटक रेल पूर्वाधारमा गरिएको प्रयोग हो। यो संरचना रिइनफोर्स्ड कन्क्रिटबाट बनेको हो, जसका सबै भागहरू ओसाका-आधारित कम्पनी Serendix ले अफ-साइट 3D प्रिन्ट गरेको हो।
तत्पश्चात ती भागहरू स्टेशनमा ल्याइएका थिए र करिब ६ घण्टामा मात्र, रेल सेवा बन्द नभएको समयमा, तिनलाई असेंबल गरिएको थियो। परम्परागत निर्माण विधिलाई तुलना गर्दा यो अत्यन्तै छिटो र प्रभावकारी हो। यसरी यात्रु र स्थानीय बासिन्दाहरूलाई सस्तो, बलियो र मौसम प्रतिरोधी संरचना प्राप्त भयो, त्यो पनि बिना झन्झट। JR वेस्टका अनुसार, यो भवनको भूकम्प प्रतिरोध क्षमता परम्परागत कन्क्रिट घरहरूजस्तै बलियो छ।
स्थानीय संस्कृतिको सम्मान गर्ने डिजाइन
यो भवन आधुनिक प्रविधिबाट बनेको भए पनि यसको डिजाइनले अरिदा सहरको सांस्कृतिक र आर्थिक विशेषताहरू झल्काउँछ। भवनको बाहिरी भागमा सहरको प्रमुख उत्पादन मन्डारिन सुन्तला र बेल्टफिश (प्रकारको माछा) का सजावटी आकृतिहरू छन्।
यसको गोलाकार, गुम्बज-जस्तै आकारले जापानी परम्परागत वास्तुकलाको झल्को दिने मात्र होइन, भविष्यको प्रविधि र स्थानीय परिचयबीचको सुन्दर सामंजस्यलाई पनि देखाउँछ।
साना स्टेशनहरूका लागि ठूलो समाधान
जापानको रेल सञ्जाल विश्वमै प्रसिद्ध छ, तर ग्रामीण क्षेत्रका स्टेशनहरूले पछिल्ला वर्षहरूमा जनसंख्या घट्ने र बजेटको अभावका कारण समस्याहरू झेल्दै आएका छन्।
JR वेस्टले 3D प्रिन्टिङलाई यस्ता चुनौतीहरूको सस्तो, छिटो र भरपर्दो समाधानको रूपमा हेरेको छ। हात्सुशिमा स्टेशनलाई यो प्रविधिको परीक्षण केन्द्रको रूपमा प्रयोग गरिएको छ। यदि यो सफल हुन्छ भने, जापानभरिका साना र मध्यम आकारका अन्य स्टेशनहरूमा पनि यस प्रविधिबाट नवीकरण गरिनेछ।
यात्रुका लागि यसको अर्थ
जापानको रेल यात्रा गर्ने यात्रुहरूका लागि—विशेष गरी ग्रामीण क्षेत्रका अनौठा गन्तव्यहरूमा जानेहरूका लागि—यो परियोजनाले अझ आरामदायी, आधुनिक र दिगो अनुभव दिने संकेत दिन्छ।
हात्सुशिमा स्टेशन सानो भए पनि यसको अर्थ ठुलो छ। यो भविष्यतर्फको एक बलियो पाइला हो—जसले गुणस्तरमा सम्झौता नगरी नवीनतालाई अँगाल्ने जापानको सोचलाई देखाउँछ।
वाकायामाको यात्रा सोच्दै हुनुहुन्छ?
समुन्द्री दृश्य, ऐतिहासिक मन्दिरहरू र अब प्रविधिमा विश्वप्रथम उपलब्धि पनि भएको यो क्षेत्र उत्साही यात्रुहरूको लागि एक अद्वितीय गन्तव्य हो। कान्साई वाइड एरिया पास प्रयोग गरेर अरिदा शहर र यसको वरपरको सौन्दर्य पत्ता लगाउनुहोस्।
फेसबुकबाट कमेन्ट गर्नुहोस्