धुम्बाराहीबाट कुर्लिए ओली, ‘चुनाव हामी जित्छौँ’

२०७३ फागुन १६ गते सोमबार, प्रकाशित

प्रमुख प्रतिपक्षी दल नेकपा एमालेका अध्यक्ष केपी शर्मा ओलीले सरकारमा सहभागी भएर चुनावमा जाने आफ्नो पार्टीको चाहना नरहेको प्रष्ट पारेका छन् । ओलीले एमाले प्रतिपक्षमै बसेर चुनाव जित्ने तयारीमा रहेको बताएका छन ।

पार्टी केन्द्रीय कार्यालय धुम्बाराहीमा सोमवार मेची–महाकाली अभियानमा सहभागी हुने करीव १ हजार स्वयंसेवकका लागि आयोजित विशेष प्रशिक्षण भेलालाई सम्बोधन गर्दै ओलीले सरकारमा जाने रुचि एमालेलाई नरहेको दावी गरेका हुन ।

भेलालाई सम्बोधन गर्दै ओलीले भने–‘हामी सरकारमा होइन, प्रतिपक्षमै बसेर चुनाव लड्न चाहान्छौं र जित्छौं । सरकारमा भएकाहरुले पुलिस प्रशासन लगाएर चुनाव जितौंला भन्ने सोचेका होलान् तर, यिनीहरु बेइमान हुन् भन्ने पुलिस प्रशासनका सबैलाई थाहा छ । आदेश आउँदा हस् साब भन्छन् तर, बेइमानले भनेको मान्दैनन् ।’

फागुन २१ देखि शुरु गर्न लागेको मेची महाकाली तराई मधेस अभियानले हिमाल, पहाड र तराईबीच भवनात्मक एकता गराउने दाबी एमाले नेताहरुले गरेका छन् । साथै अभियानमा लाखौं मधेसी जनता परिचालन हुने दाबी गरेका छन ।

भेलामा बोल्दै एमाले नेताहरुले एमालेलाई मधेस विरोधी भनेर प्रचार गर्नेहरुलाई मधेसकै बस्तीमा पुगेर जवाफ दिइने बताएका छन । अध्यक्ष ओलीले मधेस अभियानमा लाखौं जनता सहभागी हुने भन्दै यो अभियानको फोटो खिच्न ड्रोन र स्याटेलाइटले मात्र सम्भव हुने दोर्होयाएका छन् ।

अध्यक्ष ओलीले भने–‘एमालेको यो अभियान मधेस, पहाड र हिमालको जनसागर हुनेछ । यसको फोटो खिच्न कुनै अग्लो घरको छतबाट क्यामेरा सोझ्याउँदैमा सकिँदैन । स्याटेलाईट र ड्रोनले मात्र सम्भव हुनेछ । हामी देखाउनेछौं मधेसी जनता र मधेसमा एमाले कति लोकप्रिय छ भन्ने ।’

भेलालाई सम्बोधन गर्ने क्रममा एमाले सचिव भट्टराईले पृथ्वीनारायण शाहले गर्न बाँकी रहेको मुलुकको भावनात्मक एकीकरण एमालेले गर्ने दाबी गरेका छन । उनले भने–‘पृथ्वीनारायण शाहले भौगोलिक एकीकरण मात्र गरे भन्नेहरुलाई एमालेले यो अभियानबाट देखाउनेछ, मुलुकको भावनात्मक एकीकरण एमालेले गर्नेछ ।’

एमालेको यो अभियानमा एक हजार पूर्णकालीन स्वयंसेवक खटिनेछन् । उनीहरुलाई केन्द्रीय कार्यालयमा अभियानका क्रममा पालना गर्नुपर्ने नियमहरुको बारेमा विशेष प्रशिक्षण दिइएको एमाले मुख्यालयले बताएको छ ।