नयाँ शक्तिको उदय, ७ बर्षमा गरिबी अन्त्य

२०७३ जेठ ३० गते आइतबार, प्रकाशित

काठमाण्डौको दशरथ रंगशालाबाट हजारौँ संस्थापक सदस्यहरुका बिच नयाँ शक्ति नेपालको घोषणा गर्दै पार्टीका संयोजक डा. बाबुराम भट्टराईले प्रत्येक नेपालीको घर नभएसम्म आफूले निजी घर र सम्पत्ति नजोड्ने घोषणा गर्नुभएको छ । पार्टी घोषणा कार्यक्रमलाई सम्बोधन गर्दै पूर्व प्रधानमन्त्री डा.भट्टराईले आफू आर्किटेक्ट पनि भएको र अप्रत्यक्ष रुपमा धेरै घरको नक्सा कोरेको भन्दै भन्नुभयो, ‘म आज भिष्मप्रतिज्ञा गर्न चाहन्छु, म आफ्नो घरको नक्सा कोर्ने छैन ।’

सामान्य किसान परिवारको आफू प्रधानमन्त्री भइसकेको र त्यो भन्दा ठूलो कार्यकारी पद अर्को नभएको भन्दै उहाँले भन्नुभयो, ‘मैले लिनु केही छैन । म आफ्नो बाँकी जीवन युवा पुस्ताहरुका लागि र देशका लागि समर्पित गर्न चाहन्छु ।’

मुलुकभित्र रोजगारीको सिर्जना नहुँदा मुलुकको युवाशक्ति विदेशिन वाध्य भएको र मुलुकको आर्थिक विकास पछाडि परेको भन्दै नयाँ शक्तिले आर्थिक विकास र समृद्धिलाई पहिलो एजेण्डा बनाएर काम गर्ने भट्टराईले बताउनु भयो । डा. भट्टराईले ७ वर्षभित्र गरिबी अन्त्य गर्ने तथा १५ वर्षभित्र प्रतिव्यक्ति आय अहिलेको भन्दा दश गुणा बढी बढाउन सकिने कार्ययोजना नयाँ शक्तिसँग रहेको दाबी गर्नुभएको छ ।

तत्कालीन एमाओवादी पार्टी परित्याग गरी नयाँ शक्ति निर्माणको अभियानमा लाग्नुभएका भट्टराईले ८ महीना भन्दा लामो छलफल र अभियानपछी आज औपचारीक रुपमा नयाँ शक्तिको घोषणा गर्नुभएको हो । नयाँ संविधान जारी भएसँगै राजनीतिक आन्दोलन पूरा भएको र पुराना पार्टीहरुबाट संविधानले लिएको लक्ष्य अनुसार मुलुकको आर्थिक समृद्धि सम्भव नभएकाले नयाँ शक्तिको जन्म भएको भट्टराईको तर्क छ ।

जनयुद्धका क्रममा धेरैले ज्यान गुमाएको र त्यसको घाउचोट अँझै बाँकी रहेको भन्दै पूर्व माओवादी नेता समेत रहेका भट्टराईले भन्नुभयो, क्रान्तिको नियम निर्मम हुँदोरहेछ । अब इतिहाँसलाई थाति राखौं । टीआरसी (सत्यनिरुपण तथा मेलमिलाप र वेपत्ता छानविन आयोग) मा छाडेका छौं । हामी बचनबद्ध हौं कि त्यसले निश्पक्ष काम गरोस् ।’ उहाँले अगाडी भन्नुभयो, टीआरसीको निर्णय मान्न म तयार छु ।’

नयाँ शक्ति निर्माणका लागी भट्टराईलाई दुई दर्जनभन्दा बढी पुर्र्व माओवादी नेता र केही पूर्व प्रशासक लगायतले साथ दिएका छन् । अबको निकास, आर्थिक विकास भन्ने नारासहित घोषणा गरिएको नयाँ शक्तिले जेठ ३१ र ३२ गते पार्टीको विधान, राजनीतिक प्रतिवेदन, आर्थिक कार्ययोजना लगायतका बारेमा छलफल गरी नेतृत्व चयन गर्ने तालिका छ ।