भारतको भू–उपग्रहमा नेपाललाई पनि सुविधा

२०७४ वैशाख २४ गते आइतबार, प्रकाशित

भारतले शुक्रबार प्रक्षेपण गरेको साउथ एसिया स्याटेलाइट (भू–उपग्रह) मा नेपाल सहित छिमेकी राष्ट्रहरुलाई विशेष सुविधा दिने घोषणा गरेको छ । तर उक्त सुविधा उपभोग गर्न सबै छिमेकी राष्ट्रले आफ्नै अर्थ स्टेसन सहितका पूर्वाधार खडा गर्नुपर्नेछ ।

शुक्रबार भारतले बहुप्रतीक्षित उक्त स्याटेलाइट प्रक्षेपण गरेको थियो । उक्त स्याटेलाइटमा भारतले दक्षिण एसियाली छिमेकीलाई सुविधा दिने घोषणा गरेको छ । नेपालका लागि पनि दुई स्लटमा ३६ मेगाहर्ज सुविधा दिने घोषणा गरेको छ ।

साउथ एसिया स्याटेलाइट नाम दिएको उक्त योजनामा पाकिस्तान भने सहभागी छैन् । छिमेकी देशलाई केही सुविधा दिने भनेर भारतले घोषणा गरेकाले नेपालले पनि सो सुविधा प्रयोग गर्न सक्ने सूचना तथा संचार मन्त्रालयका प्रवक्ता रामचन्द्र ढकालले बताएका छन ।

‘भारतले उक्त स्याटेलाइटमा केही सुविधा दिने भनेको छ तर के कति भन्ने यकिन भएको छ्रैन,’ ढकालले भने, ‘त्यो सुविधा प्रयोग गर्न नेपालले पनि केही तयारी गर्नुपर्छ ।’