प्रहरीले गुण्डा नाइकेमाथी गोली चलायो

२०७३ असार ९ गते बिहीबार, प्रकाशित

जसवन्त राई भनेर चिनिने गुण्डा नाइके पूर्ण गुरुङलाई प्रहरीले आज दिउँसो काठमाण्डौ, बबरमहल स्थित बिजुलीबजारबाट पक्राउ गरेको छ । महानगरीय प्रहरीको अपराध महाशाखाले उनलाई गोली हानेर पक्राउ गरेको छ । प्रहरीमाथी नै आक्रमण प्रयास गरेपछी गुण्डा नाइके गुरुङमाथी गोली हानिएको प्रहरीले बताएको छ ।

प्रहरीका अनुसार पक्राउ गर्ने क्रममा उनले प्रहरीमाथि रडले आक्रमण गरेपछि गोली चलाउनु परेको हो । उनलाई खुट्टामा दुई ओटा गोली लागेको छ । एउटा गोली पिँडुलामा लागेको छ भने एउटा तिघ्रामा लागेको छ । गोली लागी घाईते भएका गुरुङको हाल वीर अस्पतालको ट्रमा सेन्टरमा उपचार भईरहेको छ ।

गुरुङविरुद्ध कालिमाटी, कलंकी क्षेत्रका होटल रेष्टुरेन्टहरुमा धम्क्याएर रकम उठाउने गरेको भन्दै उजुरी परेको अपराध महाशाखा प्रमुख सर्वेन्द्र खनालले बताउनु भएको छ । चार दिन अघि उनले हप्ता नदिएको भन्दै कालीमाटी आसपासका तीन जनालाई कुटपिट गरेका थिए ।

काठमाडौंको बाफलमा बस्दै आएका जसवन्तले कालीमाटी, टेकु, कलंकी क्षेत्रमा गुन्डागर्दी गर्दै आएको प्रहरुले बताएको छ । जसवन्त गुरूङमाथी दुई वटा ज्यान मार्ने उद्योगमा मुद्दा दायर छ भने केही सार्वजनिक अपराधमा पनि उनी प्रहरीको फरार सूचीमा रहेका थिए ।