दशैं धुमधामसँग मनाउँदै दर्शन समाज जापान

२०७४ भदौ २३ गते शुक्रबार, प्रकाशित

जापानमा रहेका ठकुरीहरुको साझा संस्था दर्शन समाज जापानले यसपालीको दशैं धुमधामसँग मनाउने तयारी गरेको छ । समाजको दोस्रो बार्षिक उत्सव र दशैंको शुभकामना आदानप्रदान कार्यक्रम सँगै परेकाले पनि यसपालीको दशैँ बिशेष हुने दर्शन समाजले जनाएको छ ।

समाजको दोस्रो बार्षिक उत्सव तथा शुभकामना आदानपप्रदान कार्यक्रम असोज १४ गते अर्थात सेप्टेम्बर ३० तारीख शनिबार विजयादशमीको दिन हुने भएको छ । कार्यक्रम सिनओकुबोस्थित टोकियो रोधी क्लवको सभाहलमा दिउँसो साढे १२ बजेबाट सुरु हुने बताईएको छ ।

बार्षिक उत्सव समारोहसंगै दशैँको टिकाको साईत पारेर टिका तथा जमरा ग्रहणको कार्यक्रम रहेको समाजका अध्यक्ष सुरज मल्लले जानकारी गराएका छन । कार्यक्रममा देउराली पञ्चेबाजा समुहको प्रस्तुती सहित बिभिन्न आकर्षक नृत्यहरु समेत प्रस्तुत गरिने बताईएको छ ।

दशैंलाई अँझ बिशेष बनाउन यसपाली दर्शन समाज जापानले नौमती बाजाको समेत ब्यवस्था गरेको छ । नौमती बाजालाई कृष्ण मल्ल र भुवनसिंह ठकुरीले प्रायोजन गरेको समाजका अध्यक्ष मल्लले जानकारी गराएका छन । दर्शन समाज जापानले दशैंको शुभकामना आदानप्रदान कार्यक्रममा सहभागी हुन जापानबासी सबै नेपालीलाई आग्रह गरेको छ ।