दर्शन समाजको भलिबल र चिठ्ठा कार्यक्रम एकैदिन

२०७४ भदौ २७ गते मंगलबार, प्रकाशित

जापानमा रहेका ठकुरीहरुको साझा संस्था दर्शन समाज जापानले आगामी नोभेम्बरमा जापान स्तरीय खुल्ला भलिबल प्रतियोगिताको आयोजना गर्ने भएको छ । समाजका अध्यक्ष सुरज मल्लका अनुसार भलिवल प्रतियोगिता नोभेम्बर ६ तारीख सोमबारका दिन नागोयामा हुनेछ ।

प्रतियोगितामा प्रथम हुने टिमले २ लाख ५० हजार येन पुरस्कारका साथै मेडल र प्रमाणपत्र प्राप्त गर्नेछ भने दोस्रो हुने टिमले एक लाख ५० हजार येन र मेडल तथा प्रमाणपत्र प्राप्त गर्नेछ । प्रतियोगीतामा तेस्रो हुने टिमलाई पनि सान्त्वना पुरस्कारको व्यवस्था गरिएको समाजका अध्यक्ष मल्लले बताएका छन ।

प्रतियोगीतामा सहभागी हुनका लागी प्रति टिम ४० हजार येन दर्ता शुल्क तोकिएको छ । जापानमा रहेका नेपालीहरुबिच आपसी सद्भाव र खेलको क्षमता अभिबृद्धीका लागी भलिवल प्रतियोगिता आयोजना गरिएको अध्यक्ष मल्लले बताएका छन ।

त्यसैगरी समाजले सोही दिन भाग्यशाली चिठ्ठाको नतिजा पनि घोषणा गर्ने भएको छ । समाजले दशैँ तथा तिहारको अवसरमा भाग्यशाली चिठ्ठा उपहार योजना खोल्ने भएको छ । सोही उपहार योजनाको नतिजा नोभेम्बर ६ तारीखकै दिन खोल्ने समाजका अध्यक्ष सुरज मल्लले बताएका हुन ।

भाग्यशाली उपहार योजना अन्र्तगत पहिलो पुरस्कार करिब १ लाख ५० हजार येन बराबरको डिजिटल भिडियो क्यामेरा रहेको छ भने दोस्रो उपहार ड्रागन एयरको जापान–काठमाण्डौ दोहोरो टिकट रहेको छ ।

तेस्रो उपहारका रुपमा लेनोभो कम्पनीको करिब ७० हजार येन बराबरको ल्यापटप रहेको छ भने चौथो उपहारका रुपमा पाँच जनालाई १० हजार येन पर्ने ट्याब रहेको छ । त्यसबाहेक चिठ्ठा कार्यक्रममा अन्य थुप्रै उपहार योजना समावेश गरीएको छ ।

दर्शन समाज जापानका अध्यक्ष सुरज मल्लका अनुसार उपहार चिठ्ठाको मुल्य १ हजार ५ सय येन रहनेछ । भलिवल तथा चिठ्ठा कार्यक्रमका बारेमा थप जानकारी केही दिनपछी सार्बजनिक गरीने मल्लले बताएका छन ।