पहिलोपटक मिस युनिभर्समा नेपाली, भोटको अपील

२०७४ मंसिर ६ गते बुधबार, प्रकाशित

देशको प्रतिनिधित्व गर्दै पहिलोपटक मिस युनिभर्सको प्रतिस्पर्धामा भिडिरहेकी सुन्दरी नगमा श्रेष्ठले आफूलाई भोट गर्न देशवासीलाई आग्रह गरेकी छन् । यति बेला प्रतिस्पर्धाका विभिन्न राउन्डको तयारीमा रहेकी नगमाले लस भेगासबाटै विज्ञप्ति जारी गर्दै भोटको अपिल गरेकी हुन् ।

नगमालाई एउटा जिमेल अकाउन्टबाट दैनिक १० भोटसम्म गर्न सकिनेछ भने ट्वीटरमार्फत पनि भोट गर्न पाइनेछ । मिस युनिभर्सको फिनाले आइतबार हुँदै छ । नगमाले उक्त प्रतिस्पर्धाका लागि देशको प्रतिनिधित्व गर्ने संस्कृति झल्किने भेषभूषासहित प्रस्तुत हुने जनाइसकेकी छन् ।

पहिलोपटक मिस नेपाल युनिभर्स हुँदै प्रतिस्पर्धा गर्न पाउँदा आफूमा दायित्वबोध भएको उल्लेख गर्दै नगमाले विज्ञप्तिमा भनेकी छन, ‘मैले आफूलाई तयार गर्न विभिन्न प्रशिक्षण पनि लिइरहेकी छु । तर मेरो यी सबै मिहिनेतलाई सफल पार्न तपाईंको भोट पनि अमूल्य छ । त्यसैले मलाई भोट गर्नुहुन समस्त नेपालीलाई आग्रह गर्न चाहन्छु । तपाईंको भोट र मेरो मिहिनेतले नै हामीलाई सफलता दिलाउनेछ ।’