एकाबिहानै रमनटारमा दुर्घटना, ९ को मृत्यु

२०७३ साउन १६ गते आइतबार, प्रकाशित

मकवानपुरको मनहरीमा–३ मा पर्ने रमनटारमा एकाबिहानै भएको बस दुर्घटनामा ९ जनाको ज्यान गएको छ । बस दुर्घटनामा परी ६ जनाको घटनास्थलमै, २ जनाको अस्पताल लैजाने क्रममा र एक जनाको उपचारको क्रममा मृत्यु भएको हो । दुर्घटनामा ३१ जना घाईते भएका छन् ।

दुर्घटनामा परी मृत्यु हुने लक्ष्मी प्रसाद अधिकारी, मणिरत्न चौधरी, सन्तोष चौधरी र विनोद चौधरीको पहिचान भएको छ । उनीहरु सबै उदयपुरका भएको प्रहरीले बताएको छ । अरु ५ जनाको भने पहिचान हुन सकेको छैन । मृतकहरु कुन बसमा सवार थिए भन्ने पनि यकिन नभएको प्रहरीले बताएको छ ।

काठमाडौँबाट काँकडभिट्टा जाँदै गरेको ना.५ ख ५०५५ नम्बरको को अग्नि यातायातको बस र उदयपुरबाट काठमाडौँतर्फ आउँदै गरेको ना.५ ख ४०६४ नम्बरको रात्रिबस एकआपसमा ठोक्कीएका हुन । दुर्घटना हेटौँडा–नारायणगढ सडकखण्डमा पर्ने मनहरीमा–३ स्थित रमनटारमा बिहान ३ बजे भएको मकवानपुर प्रहरीले बताएको छ ।

दुर्घटनामा घाईते भएकाहरुको हेटौंडा स्थित चुरेहिल अस्पतालमा उपचार भइरहेको छ । घाइतेमध्ये ४ जनाको अवस्था गम्भीर रहेको प्रहरीले बताएको छ । मृतकहरुको शब पनि हेटौँडा अस्पताल लगिएको प्रहरीले बताएको छ ।