कार दुर्घटनामा कोरीयामा नेपालीको मृत्यु

२०७३ साउन १६ गते आइतबार, प्रकाशित

रोजगारीका लागी दक्षिण कोरिया पुगेका एक नेपालीको कार दुर्घटनामा परी मृत्यु भएको छ । कार दुर्घटनामा मृत्यु हुने पाल्पाका हेमन्त आचार्य रहेका छन । दुर्घटना शनिबार बिहान ३ः३० बजेतिर खावन्दो वन्जुमा भएको थियो । आचार्यको घटनास्थलमै मृत्यु भएको हो ।

आचार्यका साथीहरुले दिएको जानकारी अनुसार उनी सात महिनाअघि कम्प्युटरमा आधारित परीक्षा (सीबिटी) उत्तीर्ण गरेर पुन कोरिया गएका थिए । यसअघि उनी ४ बर्ष १० महीनाको अबधी पुरा गरेर नेपाल फर्केको बुझिएको छ ।

घुम्न निस्केको बेला रोकिराखेको ट्रकमा ठोक्किएर कार दुर्घटना भएको जानकारी प्राप्त भएको छ । कार कसले चलाएको थियो भन्ने थाहा हुन सकेको छैन । उनी गाडी मर्मत गर्ने कम्पनिमै काम गर्दै आएका थिए ।

उता सोलस्थित नेपाली दूताबासले घटनाको औपचारिक जानकारी हालसम्म नआएको बताएको छ । शनिबार र आइतबार कोरीयामा बिदा हुने भएकाले पनि प्रहरी प्रतिवेदन नआएको बताईएको छ । दुर्घटनाबारे मृतकका परिवारलाई जानकारी गराइसकीएको छ ।