आन्दोलनमा घाईतेको बिल ७३ हजार, भुक्तानि २५ लाख

२०७३ साउन २२ गते शनिबार, प्रकाशित

तराईमा भएको आन्दोलनका क्रममा घाईते भएकाहरुको उपचार खर्च बेहोर्ने बिषयमा भएको सहमति अनुसार सरकारले उपचार खर्च भुक्तानि गरेको छ । तर घाईतेहरुको उपचार खर्च बेहोर्ने भन्ने सहमति भएपनि लागेको खर्च भन्दा धेरै रकम निकासा भएको पाईएको छ ।

सामान्यतया उपचारका क्रममा लागेको खर्चको विलका आधारमा रकम निकासा हुनुपर्नेमा अस्पतालले उपलब्ध गराएको विल भन्दा कैयौँ गुणा बढि रकम निकासा भएको छ । घाईते भएकाको उपचारका क्रममा खर्च भएको अस्पतालको विल जम्मा ७३ हजारको मात्र भएपनि सरकारले भने २४ लाख भन्दा बढि रकम भुक्तानि गरेको छ ।

गृह मन्त्रालयले १९ घाइतेमध्ये १३ लाई २४ लाख ४८ हजार ३५४ रुपैयाँ उपचार खर्चका रुपमा भुक्तानी दिइसकेको छ । गत फागुन ३० मा गृह मन्त्रालयले उपचार खर्च दिने सहमति गरेपछि मन्त्रिपरिषदले निर्णय गरेको थियो । रकम निकासाका लागि चैत ८ मा अर्थ मन्त्रालयमा फाइल पुगेको थियो ।

मोर्चाले उपचारको क्रममा रहेका घाइतेहरूको नाम उपलब्ध गराए अनुसार नै सरकारले भुक्तानी दिएको थियो । १९ मध्ये मोर्चाका ६ नेता–कार्यकर्ताले ६ लाख ६९ हजार २ सय ५ रुपैयाँ रकम मात्र बुझ्न बाँकी थियो ।

मधेस आन्दोलनमा ज्यान गुमाएका ५७ जनाको परिवारलाई १० लाख क्षतिपूर्ति उपलब्ध गराउने निर्णय पनि अघिल्लो मन्त्रीपरीषदले गरेको थियो । क्षतिपूर्तिको रकम जिल्लामा निकासासमेत भइसकेको थियो ।

त्यो भन्दा पहिले ओली नेतृत्वको सरकारले संयुक्त लोकतान्त्रिक मधेसी मोर्चाको आन्दोलनमा घाइते भएका १९ जनाको ३१ लाख उपचार खर्च व्यहोरिसकेको थियो ।