हात खुट्टा बाँधेर किशोरीको बलत्कार

२०७३ साउन २७ गते बिहीबार, प्रकाशित

रौतहटको राजपुरतुल्सीमा घाँस काट्न गएकी एक किशोरीलाई गाउँकै एक युवकले हात खुट्टा बाँधेर बलत्कार गरेका छन् । पचरुखी गाविसको राजपुरतुल्सीमा खेतमा घाँस काट्न गएकी १३ बर्षिया किशोरीलाई १८ वर्षीय युवकले हात खुट्टा बाँधेर रातभर बलात्कार गरेका हुन् ।

मंगलबार घाँस काट्न गाउँभन्दा पश्चिम राजपुरतुल्सीतिर गएको बेला छतौना टोलका राजेश महरा नाम गरेका युवकले कोही नभएको मौका छोपेर जबरजस्ती बलात्कार गरेको पीडित किशोरीले बताएकी छिन् । पिडित किशोरीका अनुसार महराले हातखुट्टा बाँधेर रातभर बलात्कार गरेको र बिहान उज्यालो भएपछि बाँधेकै अवस्थामा छाडेर फरार भएका थिए ।

घाँस काट्न गएकी छोरी मंगलबार राति अबेरसम्म पनि घर नफर्किएपछि परिवारजन र आफन्तले खोजतलास शुरु गरेका थिए । बुधवार दिउँसो २ बजे खेतमा हात–खुट्टा बाँधिएको र अचेत अवस्थामा किशोरी फेला परेकी थिइन् । परिवारका सदस्यहरुले घरमा ल्याएपछि उनको होस खुलेको थियो ।

पीडितको ठाडो उजुरीका आधारमा रौतहट प्रहरीले युवकको खोजतलास सुरु गरेको छ । बलात्कृत किशोरीको जिल्ला अस्पताल गौरमा स्वास्थ्य परिक्षण गराईने प्रहरीले जानकारी दिएको छ ।