विर्तादेउराली दुर्घटना, न रुट न ड्राईभरको लाईसेन्स

२०७३ भदौ १ गते बुधबार, प्रकाशित

गत सोमबार २७ जनाको ज्यान जानेगरी काभ्रेको विर्ता देउरालीमा दुर्घटना भएको बसले रूट परमिट नै नलिएको पाईएको छ । सो रूटमा सार्वजनिक यातायात सञ्चालन गर्न हालसम्म परमिट नै जारी नगरेको यातायात व्यवस्था विभागले बताएको छ ।

यातायात व्यवस्था विभागका निर्देशक बसन्त अधिकारीका अनुसार दुर्घटनामा परेको बा ३ ख १०३ नम्बरको बसले काठमाडौं–जिरी का लागी रूट परमिट पाएको थियो । ‘उक्त सडकमा सार्वजनिक बस चलाउने परमिट नै दिइएको छैन,’ अधिकारीले भन्नुभयो–‘उक्त बसलाई काठमाडौं–जिरी चलाउन परमिट दिइएको थियो ।’

धेरै पहाडी जिल्लामा रूट परमिट बिनै बस चल्दै आएको र ट्राफिक प्रहरीले कारबाही गर्न नसकेको अधिकारीले बताउनु भएको छ । दुर्घटनामा परेको बसका चालकको लाइसेन्स पनि नक्कली भएको खुलेको छ ।

भौतिक पूर्वाधार एवम् यातायात मन्त्री रमेश लेखकले पछिल्लो समय सडक दुर्घटना बढेपछि सरोकारवालासँग मन्त्रालयमै गरेको छलफलमा उक्त बसका चालकको लाइसेन्स नक्कली भएको खुलेको हो । गत सोमबार काभ्रेको विर्तादेउरालीमा भएको गाडी दुर्घटनामा २७ जनाको मृत्यु भएको थियो भने ४१ जना जना घाईते भएका थिए । केही घाईतेको अवस्था अँझै गम्भीर रहेको छ ।