भरुवा बन्दुकले हानेर दुईजनाको हत्या

२०७३ भदौ ६ गते सोमबार, प्रकाशित

दाङको गढवामा तिजको नाच हेर्न गएका दुई जनाको गोली हानी हत्या गरिएको छ । देउखुरीको गढुवा–५ का ३२ वर्षीय कर्णबहादुर पुनले स्थानीय ३२ वर्षीय राजु रोका र कालु रोकाको गोली हानी हत्या गरेका हुन ।

भरुवा बन्दुकले हानेर हत्या गरेको दाङका प्रहरी प्रमुख एवं एसपी धिरजप्रताप सिंहका अनुसार पुनले रोकाद्वयलाई भरुवा बन्दुकले हानेर हत्या गरेका हुन । गएराति खबरी नाकामा स्थानीय तीजको नाच हेर्न पुगेका रोकाद्वयलाई पुनले पुरानो रिसिवि साँध्न गोली हानेको एसपी सिंहले बताउनु भएको छ ।

एसपी सिंहले भन्नुभयो–‘पुनले योजनाबद्ध रुपमा आक्रमण गरेको देखियो, उसले पहिले नै भरुवा बन्दुक लुकाएर राखेको रहेछ, रोकाद्वय मोटरसाइकलमा चढेलगत्तै उसले गोली हान्दा एउटाको घाँटी छेड्दै अर्कालाई पनि गोली लागेको पाइएको छ ।’

गोली लागेर गम्भीर घाइते भएका कालु रोकाको उपचारका लागि बाँकेको कोहलपुर लैजाँदै गर्दा बाटोमै मृत्यु भएको थियो । अर्का घाइते राजु रोकाको लमही स्वास्थ्य केन्द्रमा उपचारका क्रममा मृत्यु भएको हो ।

‘पुनले योजनाबद्ध रुपमा आक्रमण गरेको देखियो, उसले पहिले नै भरुवा बन्दुक लुकाएर राखेको रहेछ, जब रोकाद्वय मोटरसाइकलमा चढेलगत्तै उसले गोली हान्दा एउटाको घाँटी छेड्दै अर्कालाई पनि गोली लागेको पाइएको छ ।’

मदिरा सेवन गरेका पुनले आईतबार राति साढे १० बजे रोकाद्वयलाई गोलि हानेको प्रहरीले बताएको छ । गोलि हानेर पुन फरार भएका छन् । प्रहरीले आसपासका नाका बन्द गरेर खोजतलास सुरु गरेको छ ।