ट्रक त्रिशुलीमा खस्यो, ७ जनाको उद्धार

२०७३ भदौ ११ गते शनिबार, प्रकाशित

नारायणगढ–मुग्लिन सडक खण्डमा पर्ने जलवीरे नजिकैबाट आज बिहान ट्रकसहित त्रिशुली नदीमा खसेका सात जनाको प्रहरीले उद्धार गरेको छ । मुग्लिनबाट बालुवा लिएर नारायणगढतर्फ आउँदै गरेको ना ३ ख ४५५६ नम्बरको ट्रक त्रिशूली नदीमा खसेको हो ।

चितवन प्रहरी प्रमुख वसन्तबहादुर कुँवरका अनुसार ट्रक पानीमा डुबेको अवस्थामा छ । ट्रकबाट तीन बालबालिका, दुई महिला र दुई पुरुषको उद्धार गरिएको प्रहरीले जनाएको छ ।

घटनास्थलमा रहेका प्रहरी निरीक्षक योगेन्द्रबहादुर हमालका अनुसार घाइते भएका उनीहरुलाई उद्धार गरी उपचारका लागि भरतपुरतर्फ पठाइएको छ । घाइते हुनेमा चालक र सहचालक पनि छन् ।

ट्रक बिहान करिब ७ बजेतिर त्रिशुलीमा खसेको अनुमान गरिएको छ । बिहीबार मात्रै यात्रुबाहक बस त्रिशूलीमा खसेर २२ जनाको मृत्यु भएको थियो भने १६ जना घाइते भएका थिए । चार जना अँझै बेपत्ता भएका छन् । रासस