गृहमन्त्री नै भन्छन–‘तस्कर र गुण्डाको हातमा देश’

२०७५ वैशाख ३१ गते सोमबार, प्रकाशित

अहिलेसम्म जनताले भन्थे, ‘यो देश माफियाको हातमा छ । सरकार तस्करले चलाउँछन् । ठेकेदारको हातमा देशको अर्थतन्त्र छ ।’ तर, अब गृहमन्त्री रामबहादुर थापा ‘बादल’ आफैंले देश माफिया, ठेकेदार र तस्करको हातमा रहेको बताउन थालेका छन् ।

गृहमन्त्री थापाले देश ठेकेदार, तस्कर र माफियाको कब्जामा रहेको भन्दै यसको अन्त्य गर्नुपर्ने बताएका हुन् । ‘देशको अर्थतन्त्र ठेकेदारको हातमा छ, जसले अर्बौंको राजश्व छलि गरेका छन,’ पोखरामा पत्रकारहरुसँग कुरा गर्दै गृहमन्त्री थापाले भने, ‘देश तस्करको हातमा छ जसले तस्करी गरिरहेका छन् ।’

देशमा मुठीभरको वर्चश्व रहेको भन्दै उनले आर्थिक समृद्धिको बाधक त्यही भएको बताएका छन । हरेक क्षेत्रको एकाधिकार नतोडी समृद्धि सम्भव नभएको उनले बताएका हुन् । ‘हरेक क्षेत्रमा एकाधिकार र कालोबजारीया छ,’ थापाले भने, ‘त्यसको अन्त्य विना विकास सम्भव छैन ।’

भ्रष्टाचार र एकाधिकारको प्रणालीलाई समाप्ति गर्न सरकारले कुनै कसर बाँकी नराख्ने उनको भनाइ थियो । नेपाल विकासको दृष्टिकोणमा पछाडि पर्नुको मुख्य कारण दरिद्रता र पछौटेपन भएको गृहमन्त्री थापाले बताएका छन । थापाले भने–‘जसका कारण युवा जनशक्ति पलायन छन । सुशासन र समृद्धिविना यी युवा फर्काउन सम्भव छैन ।’

विकासको अर्को वाधक लागूपदार्थ रहेको उनले बताएका छन । लागू पदार्थको कारोबारले देशका कर्णधारहरुको भविष्य दलदलमा फस्दै गएको थापाले बताएका छन । लागू औषध, भ्रष्टाचार, एकाधिकार, गुन्डागर्दी, राजनीतिक आवरणमा उच्छृंखल क्रियाकलाप गर्ने समूह अहिलेको मुख्य चुनौति रहेको गृहमन्त्री थापाको निष्कर्ष छ ।

गृहमन्त्री थापाले मन्दिरको नियन्त्रण र व्यवस्थापन गर्न गृहमन्त्रालयले छिट्टै अभियान चलाउने बताएका छन् । सरकारले राजश्व नतिर्ने उद्योगी, व्यवसायी र हैकमवादीको अन्त्य गर्न चाहेको पनि गृहमन्त्री थापाले स्पष्ट पारेका छन ।

स्थायी सरकार र देश समृद्धिको बाटोमा हिँडिरहेका बेला हिंसा भड्काउने कसैलाई पनि नछोड्न आइतबार सुरक्षा बैठकमा गृहमन्त्री थापाले निर्देशन दिएका थिए । राजनीतिक, धार्मिक आवरणमा हिंसा भड्काउने समूहलाई पूर्ण समाप्त पार्ने उनको भनाइ थियो ।

‘धार्मिक हिंसा भड्काउने काम पनि भइरहेको छ,’ माओवादी नेतासमेत रहेका गृहमन्त्री थापाले भने, ‘क्षेत्रीय नारा दिएर देश विखन्डन गर्ने काम पनि भइरहेको छ । सरकारले ति सबैलाई ठेगान लगाउँछ ।’

भारतीय प्रधानमन्त्री नरेन्द्र मोदीको जनकपुर भ्रमणका बेला उठेको स्वतन्त्र मधेसको ब्यानर देखिएकोप्रति संकेत गर्दै थापाले भने, ‘अलग देश र विखन्डन गर्ने कसैलाई छुट छैन ।’

गृहमन्त्री थापाले विकास र शान्ति सुरक्षामा बाधा र्पुयाउने गुन्डाहरुको लिस्ट तयार भइरहेको बताएका छन् । ‘गुन्डाराजको छिटोभन्दा छिटोभन्दा अन्त्य गर्छौं,’ गृहमन्त्री थापाले भने, ‘सबै गाउँमा गुन्डाहरुको ब्ल्याक लिस्ट तयार हुँदैछ ।’

नेपाल प्रहरीमा लामो समयदेखि बढुवा रोकिएको थियो । त्यसमा पनि डिआइजीको बढुवा लामो समयदेखि नहुँदा प्रहरीभित्र ठूलो खैलाबैला नै मच्चिएको थियोे । प्रहरीभित्र सबै तहको बढुवा गर्नका लागि तल्लो तहबाट बढुवाको थालनी गरिएको उनले बताए । ‘तल्लो तहबाट बढुवा थालिएको छ,’ गृहमन्त्री थापाले भने, ‘अब डिआइजीहरुको पनि बुढो नहुँदै बढुवा हुन्छ ।’

दुई वाम शक्ति मिलेर शक्तिशाली कम्युनिस्ट पार्टीको उदय हुन लागेको गृहमन्त्री थापाले बताएका छन् । शान्ति सुशासन र समृद्धिका लागि पार्टी एकता अनिवार्य बनेको उनले बताएका छन । स्थायित्व र विकासका लागि दल एक कठ हुनुको विकल्प नरहेको उनको भनाइ थियो ।

पार्टी एकताको सबै गृहकार्य भए पनि एकताको मिति भने तय भइनसकेको उनको भनाइ थियो । ‘यही दिन पार्टी एकता हुन्छ भनेर मैले भन्ने कुरा पनि हुँदैन, मैले भनेर पनि हुँदैन,’ गृहमन्त्री थापाले भने, ‘मिति तोकिइसकेको छैन तर पार्टी एकताका पूर्वाधार तयार भइसके ।’