गुण्डागर्दी गर्ने तरुण दलका सभापती गुरुङ खोरमा
गुण्डागर्दी गरेको आरोपमा तरुण दल सुनसरीका सभापति सिजन गुरुङ पक्राउ परेका छन् । गुरुङ्गलाई इलाका प्रहरी कार्यालय इटहरीको टोलीले शुक्रबार राति पक्राउ गरेको डिएसपी शिवकुमार श्रेष्ठले जानकारी दिएका छन ।
गुरुङलाई पछिल्लोपटक तरहराकी तीर्थकुमारी गिरीको १० धुर जग्गा कब्जा गरेको र सो जग्गामा बनाइएको घरबाट २०६८ सालदेखि भाडा असुल्दै आएको आरोप लागेको छ । यद्यपि नेता गुरुङले भने सो जग्गा आफ्नै भएको बताउँदै आएका छन् ।
निकै विवादित छविका गुरुङ यसअघि इटहरीको एक बलात्कार काण्डमा समेत मुछिएका थिए । जसमा जबरजस्ती मिलापत्र गराइएको आरोप छ । डिएसपी श्रेष्ठले गुरुङका विषयमा अनुसन्धान सुरु गरिएको बताएका छन ।
यसअघि २०७१ सालमा ट्राफिक प्रहरीमाथि हातपात गरेको आरोपमा उनलाई प्रहरीले भेडेटारबाट पक्रिएको थियो । त्यसविरुद्ध उनका समर्थकले चक्काजाम लगायतका दबावमुलक आन्दोलन गरेका थिए । नेता कार्यकर्ताको चर्को दबावपछि उनी रिहा भएका थिए ।
फेसबुकबाट कमेन्ट गर्नुहोस्