पुर्वयुवराज पारसको भव्य स्वागत, दलका कार्यकर्ता छक्कै
मंगलबार चितवन पुगेका पूर्वयुवराज पारस शाह चितवनका विभिन्न क्षेत्रको भ्रमणमा व्यस्त छन् । आफना सहयोगीसहित नितान्त व्यक्तिगत भ्रमणका लागि शाह चितवन गएको उनका निकटस्थ मित्र योगी व्यग्र बेदनाथले बताएका छन् ।
पूृव युवराज पारस पश्चिम चितवनका पर्यटकीय क्षेत्रहरुसहित पूर्वी चितवनका सौराहा लगायतका स्थानको भ्रमणमा गरिरहेको बताइएको छ । उनी सौराहा पुग्दा त्यहाँका पर्यटन व्यवसायी र स्थानीयले बाजागाजा, भजनकीर्तन र थारु सांस्कृतिक कार्यक्रमसहित सौराहा परिक्रमा गराएका थिए ।
शाहले स्थानीयको विशाल शोभायात्रा र झाँकीसहित सौराहाको हात्तीचोक हुँदै राप्ती किनारा साईटसम्म पैदल यात्रा गरेका थिए । त्यस्तै उनले सडक बालबालिकाले आश्रय लिएको स्थान मंगलपुरमा पुगेर उनीहरुसँग फुटबल समेत खेलेका थिए ।
हिन्दू धर्मको बहस उठिरहेको बेला पूर्व राजपरिवारका सदस्यहरुले अहिले देश–दौडाहा गर्दै नागरिकहरुसँग साक्षात्कार गरिरहेका छन् । पूर्व युवराज्ञी हिमानी शाहले पनि देशका विभिन्न भागको भ्रमण गर्ने क्रमलाई निरन्तरता दिन थालेको बताइएको छ ।
नेपाल कम्युनिष्ट पार्टी (नेकपा)का अध्यक्ष पुष्पकमल दाहालको गृहजिल्ला चितवनमा पूर्वयूवराज पारस शाहलाई गरिएको भव्य स्वागत र सत्कारले स्थानीय राजनीतिक दलका नेता–कार्यकर्ता चकित परेका छन् ।
नेपाललाई धर्मनिरपेक्ष घोषणा गरिनु र पछिल्लो समय सत्तारूढ दलका नेताहरूबाटै जनतालाई निराश पार्ने खालका काम हुनु लगायत कारणले दलहरूसँग भन्दा राजसंस्थाप्रति जनताको आस्था थप बढाएको चर्चा पनि स्थानीयस्तरमा चलेको छ ।
धेरैले हिन्दू राष्ट्र हुनुपर्ने र राजतन्त्र पुनस्थार्पना गर्नुपर्ने मागसहित खुल्ला रुपमा कार्यक्रम समेत गर्न थालिसकेका छन् । यसले अन्ततः गणतन्त्र र धर्मनिरपेक्षताप्रति जनताको वितृष्णा चुलिने र राजसंस्था ब्युँताउन चाहनेहरूका लागि फाइदा हुने विश्लेषण समेत भइरहेको छ ।
फेसबुकबाट कमेन्ट गर्नुहोस्