निर्मलाको न्याय माग्ने १२ अभियन्ता प्रहरी कब्जामा

२०७५ मंसिर १४ गते शुक्रबार, प्रकाशित

बलात्कार गरी हत्या गरिएकी कञ्चनपुरकी १३ किशोरी निर्मला पन्तको लागि न्याय माग गर्दै सरकारलाइ दवाब दिन पोस्टर टाँस्दै हिँडेका १२ जनालाई प्रहरीले पक्राउ गरेको छ । घटना घटेको करिव चार महिना बित्दा समेत अपराधी पत्ता लगाउन नसक्दा चारैतिर आक्रोश बढ्दो छ ।

यस्तैमा स्वतन्त्र युवाहरुको समूहले ‘सरकार भेटियो, न्याय भेटिएन’ लेखिएको निर्मलाको तस्बिर सहितको पोस्टर टाँसेर प्रदर्शन गर्ने क्रममा पक्राउ परेका हुन् । न्याय माग्दै माइतीघरमा प्रदर्शन गरिरहँदा सामाजिक अभियन्ता प्रितम सुवेदी, भावना राउत, सिर्जना विश्वकर्मा, छवि पंगेनी लगायत १२ जनालाई प्रहरीले पक्राउ गरेको छ ।

यसअघि, गत सोमबार नयाँ युगको थालनी भएको भन्दै प्रधानमन्त्री केपी शर्मा ओलीको तस्बिर अंकित पोस्टर काठमाडौँका अधिकांश सार्वजनिक स्थलमा टाँसिएको थियो । त्यसैको जवाफ स्वरुप युवाहरुले निर्मलाको तस्बिर सहितको पोस्टर टाँसेका थिए र त्यसैलाई निरन्तरता दिने क्रममा आज उनीहरू पक्राउ परेका हुन् ।

अभियन्ता प्रितमले न्यायको लागि आवाज उठाउँदा गरिएको धरपकडले आफुहरु बिचलित नहुने र प्रदर्शन जारी राख्ने चेतावनी समेत दिएका छन् । निर्मलाको न्यायका लागी कञ्चनपुरमा धर्ना जारी छ । निर्मलाका बुवा निर्मलाकै न्यायका लागी लड्दै गर्दा मानसिक अवस्था बिग्रिएपछी अस्पतालमा उपचार गराईरहेका छन् ।