जापानमा उडान अनुमति माग्न जाँदै नेपाली टोली

२०७५ भदौ २७ गते बुधबार, प्रकाशित

नेपाली जहाज जापानमा उडाउने चर्चा चलेको लामो समयपछी नेपाल एयरलाइन्सको टोली उडान अनुमतिका लागि पहल गर्न जापान जाने भएको छ । नेपाल एयरलाइन्सले जापानमा उडान गर्न पाउने सहमती भएपनि जापानले नेपाल एयरलाइन्सलाई अझै उडान भर्न अनुमति दिएको छैन ।

अब जापान जाने निगमको टोलीले नेपालको हवाई सुरक्षाको अवस्था, आफ्नो व्यवसायिक योजना, क्षमता र जापान उडानको सम्पूर्ण तयारीबारे त्यहाँको उड्डयन क्षेत्रको नियमनकारी निकायलाई जानकारी गराउने भएको छ ।

निगमका सह–प्रवक्ता शैलेस कंसाकारले नयाँ वाइडबडी विमानमार्फत जापानमा उडान भर्ने योजना बनाएको जानकारी दिएका छन । तर, जापानले तत्कालै नेपाल एयरलाइन्सलाई उडान अनुमति दिन खोजेको छैन ।

कम्पनीको सबै अवस्थाहरु अध्ययन गरेर मात्रै उडान भर्न दिने योजनामा जापान देखिएको छ । निगमले नयाँ दुई वाइडबडी अन्नपूर्ण र मकालुलाई जापानसहित कोरिया र साउदीको रियादमा पनि उडाउने योजना तयार पारेको छ ।

अहिले वाइडबडीलाई निगमकै पुराना गन्तब्यहरुमा उडाइँदैछ । नयाँ तीन वटै गन्तब्यमा निगमले सीधा उडान गर्ने योजना बनाएको छ । निगमले जापानको नारिता एयरपोर्टमा उडान भर्ने गरी तयारी गरेको हो ।

कोरियाको सियोलमा इन्चोनसम्म पनि सीधा उडानकै योजना छ । साउदीको रियाद पनि वाइडबडीले तय गर्ने नयाँ गन्तब्य हुनेछ । कोरियाको टोली भने नेपाल एयरलाइन्स र नेपाली हवाई क्षेत्रको सुरक्षा प्रवन्ध बुझ्न छिट्टै नेपाल आउँदैछ । निगमका नयाँ वाइडबडी दिनमा १२ देखि १४ घण्टासम्म उडाउन मिल्छ ।