अगष्ट २५ मा तोचिगीमा सरसफाई गर्दै नेपाली
जापानको तोचिगीमा बस्दै आएका नेपालीहरुले आगामी अगष्ट २५ तारिख आईतबारका दिन सरसफाई कार्यक्रम गर्ने भएका छन् । तोचिगी क्षेत्रमा बसोबास गर्ने नेपालीहरुको समुह तोचिगी नेपाली कम्युनिटी, तोचिगी सिटी अन्तराष्ट्रिय केन्द्र र तोचिगी सिटी अफिसको सहकार्यमा उक्त सरसफाई कार्यक्रम गर्न लागिएको हो ।
सरसफाई कार्यक्रम यही अगष्ट २५ तारिख आईतबारका दिन बिहान ७ बजेदेखी ९ बजेसम्म २ घण्टा सञ्चालन हुने तोचिगी नेपाली कम्युनिटिका संयोजक महेश लुइँटेलले जानकारी गराएका छन् । संयोजक लुइँटेलले तोचिगी क्षेत्रमा बसोबास गर्ने सबै नेपालीलाई सरसफाई कार्यक्रममा सहभागी हुनका लागी बिहान ७ बजेभन्दा अगाडी तोचिगी स्टेशनको नर्थ गेटमा जम्मा भईदिन अपिल समेत गरेका छन् ।
सरसफाई तोचिगी ट्रेन स्टेशनको उत्तरतर्फबाट तोचिगी सिटी अफिससम्मको दुरीमा गर्ने तय भएको संयोजक लुइँटेलले जानकारी गराएका छन् । तोचिगी स्टेशन देखी सिटी अफिसतर्फको मुख्य सडक र सहायक सडक गरी तिन ओटा रुटमा तिन समुह बनाई सरसफाई गर्ने व्यवस्था गरिएको छ ।
सरसफाई कार्यक्रमको ब्यवस्थापन र सरसफाईका क्रममा प्रयोग हुने पञ्जा, मास्क, फोहोर टिप्ने कुरा, फुकुरो (प्लाष्टिक) लगायतका सामाग्री उपलब्ध गराउने कार्य तोचिगी नेपाली कम्युनिटी, तोचिगी सिटी अन्तराष्ट्रिय केन्द्र र तोचिगी सिटी अफिसले गर्ने छन् । सरसफाई अवधीभर सरसफाईमा संलग्न सबैजनाको विमाको समेत व्यवस्था गरिएको छ ।
सरसफाई कार्यक्रममा एसएमएस कर्पोरेशन, लाफा रेष्टुरेन्ट, गिन्जा रेष्टुरेन्ट, तोचिगी दारुमा स्पाईस हलाल, सिटि एक्सप्रेस मनि ट्रान्सफर लगायत तोचिगीमा बस्ने आम नेपाली र व्यवसायी सहभागी हुने बताइएको छ । संयोजक लुइँटेलले सरसफाई कार्यक्रममा सहभागी भई नेपालीको प्रतिष्ठा बढाउन तोचिगीवासी सम्पुर्ण नेपालीमा आग्रह गरेका छन् ।
फेसबुकबाट कमेन्ट गर्नुहोस्