फेसबुकबाट लिक भयो ‘छक्का पञ्जा’ फिल्म

२०७३ पुष २८ गते बिहीबार, प्रकाशित

नेपाली फिल्म उद्योगमा एउटा ईतिहास रच्न सफल फिल्म ‘छक्का पञ्जा’ लिक भएको छ । फिल्म फेसबुकबाट बाहिरिएको हो । फेसबुकमा स्टाटस लेख्दै फिल्मका निर्माता एवम् कलाकार दीपकराज गिरीले यसको पुष्टि गरेका हुन् ।

हाल दीपक र फिल्मकी निर्देशक दीपाश्री निरौला फिल्मको डायस्पोरा प्रदर्शनका लागि युरोपमा छन् । गिरीले फिल्मको स्टाटस लिकं फेसबुकमा सेयर गर्नेहरु पनि अपराधमा जोडिनसक्ने भन्दै त्यस्तो नगर्न आग्रह गरेका छन् । फेसबुकमा अर्जुनकुमार श्रेष्ठ नामको अकाउण्टबाट फिल्म अपलोड भएको छ ।

स्टाटसमा गिरीले भ्रमण छोट्याउँदै नेपाल आउन लागेको बताउँदै नेपाल आएपछि कानुनी प्रक्रियामा लाग्ने फेसबुकमा लेखेका छन् । फिल्मको डिजिटल अधिकार हाईलाईट्स नेपालले किनेको थियो । दीपकले फिल्म भोलि नै युट्युबमा सार्वजनिक हुनसक्ने आफ्नो स्टाटसमा उल्लेख गरेका छन् ।

१६ करोड बढिको कारोबार गरेको फिल्म नेपाली वक्सअफिसको सर्वाधिक पैसा कमाउने फिल्म हो । बिदेशीनु पर्ने युवा जमातको कथा र बिदेश गएकाहरुको घरपरिवारमा हुने कथालाई प्रस्तुत गरेको ‘छक्का पञ्जा’लाई हाँस्यकलाकार दीपाश्री निरौलाले डेब्यु निर्देशन गरेकी हुन् ।