बाढिपहिरोको बितण्डा, ३६ जनाको मृत्यु, दर्जन बेपत्ता

२०७४ साउन २९ गते आइतबार, प्रकाशित

अविरल बर्षासंगै आएको बाढीपहिरोका कारण देशका बिभिन्न भागमा गरी आईतबार बिहानसम्म ३६ जनाको ज्यान गएको गृह मन्त्रालयले जनाएको छ । बाढिपहिरोमा परी दर्जन बढी हराईरहेका छन ।

गृह मन्त्रालयको तथ्यांक अनुसार शनिवार साँझसम्म पाँचथर–४, सिन्धुली–४, झापामा ४, मोरङ्ग–५, सुनसरी–८, सर्लाही–२, बारा–२, दाङ्ग–१, बाँके–४, मकवानपुर–१ र पाल्पामा १ गरी जम्मा ३६ जनाको मृत्यु भएको छ ।

बाढी र पहिरोमा परी दर्जनौँ घाईते भएका छन । हराईरहेकाहरुको खोजी र बाढीमा फसेकाहरुको उद्दारका लागी नेपाल प्रहरीबाट ५,६००, सशस्त्र प्रहरी करिब १,७०० र नेपाली सेना १,००० गरी जम्मा ८,३०० जना तालिम प्राप्त सुरक्षाकर्मीहरु फिल्डमा खटाइएका छन् ।

बर्षाका कारण नदी तथा खहरे खोलाको बाढी गाउँ पस्दा पूर्वका झापा, मोरङ, सुनसरी, सिरहा र सप्तरीका र कपिलबस्तुमा नदी आसपासका क्षेत्र पुर्ण रुपमा डुबानमा परेका छन् । यस्तै बाँके, बर्दिया, दाङसहितका जिल्लामा पनि बाढीले जनजीवन अस्तव्यस्त बनाईदिएको छ ।

भारतीय समकक्षीहरुसँग समन्वय गरी लक्ष्मणपुर बाँध र कोसी ब्यारेजका थप ढोकाहरु खुलाउन अनुरोध गरिएको छ । बेपत्ताहरुको खोजी तथा फसेकाहरुको उद्दारका लागि हेलीकप्टर, मोटर बोट, र्याफ्टींग बोट, डोरी, ट्युव लगायतका साधनहरु प्रयोग गरिएको छ ।

तत्काल राहतका लागि अधिकाशं जिल्लाका जिल्ला दैवी प्रकोप उद्दार समितिहरुबाट आवश्यक खाद्यान्नहरु चिउरा, दालमोट, भुजिया, चाउचाउ, चामल, दाल, नुन, तेल स्थानीय स्तरबाट खरिद गरी वितरण गरिएको छ ।

नेपाल खाद्य संस्थानका विभिन्न डिपोहरुबाट प्रभावित परिवारहरुलाई खाद्य सामाग्री वितरण गर्न प्याकेजिंग कार्य भइरहेको छ । त्यस्तै भौतिक पूर्वाधार तथा यातायात व्यवस्था मन्त्रालयले अवरुद्ध भएका राजमार्ग लगायत सडक पुलहरु सूचारु गराउन र संरक्षण गर्ने कार्य गरिरहेको छ । बिभिन्न राजमार्गहरु अबरुद्ध हुँदा सयौँको संख्यामा यात्रुहरु अलपत्र परेका छन ।

अहिले पनि अधिकांश ठाउँमा पानी परिरहेकाले पूर्वको झापा, इलाम, सुनसरी, मोरङ, सप्तरी, उदयपुर र धनकुटा, रौतहट, सर्लाही, मकवानपुर, बारा, पर्सा, चितवन, नवलपरासी, रुपन्देही, कपिलवस्तु, कञ्चनपुर, कैलाली र बर्दियाका नदीमा पानीको सतहले खतराको तह पार गर्नसक्ने भएकाले सुरक्षित भएर बस्न आग्रह गरिएको छ ।