घाँस काट्ने विषयमा विवाद हुँदा खातुनको मृत्यु

२०७३ असोज ११ गते मंगलबार, प्रकाशित

सुनसरीको नरसिंह गाविसमा सोमबार साँझ घाँस काट्ने बिषयमा विवाद हुँदा एक जनाको मृत्यु भएको छ । स्थानीय ऐलानी जग्गामा घाँस काट्ने विषयलाई लिएर चर्केको विवादमा कुटाकुट हुँदा अफरोज खातुनको मृत्यु भएको हो ।

मृतक खातुनले स्थानीय सडक पेटीको जग्गामा घाँस काटेपछि विवाद उत्पन्न भएको र सोही क्रममा कुटाकुट हुँदा उनको मृत्यु भएको हो । मृतक खातुनको शव परीक्षणका लागि जिल्ला अस्पताल इनरुवामा राखिएको छ ।

घटनामा संलग्न भएको आरोपमा जिल्ला प्रहरी कार्यालय सुनसरीले तीन जनालाई नियन्त्रणमा लिएको छ । प्रहरीले नरसिंह–१ बस्ने सवरुन खातुन, अमुना खातुन र मुस्तका मियाँलाई पक्राउ गरेको जनाएको छ ।

स्थानीयले घाँस काट्ने विषयमा भएको झगडामा कुटाकुट हुँदा आफरोजको मृत्यु भएको दाबी गरेका छन् । प्रहरीले के कति कारणले मृत्यु भएको हो सो विषयमा अनुसन्धानबाट मात्र खुल्ने जनाएको छ ।